Ոստիկանության անդրադարձն` անցորդներից գումար խնդրող ոստիկանին
Հասարակություն
Երևանի կենտրոնական փողոցներում արդեն մի քանի օր է, շրջում է մի ոստիկան՝ ոստիկանական համազգեստով, մոտենում մարդկանց, հայտնում, որ ոստիկանական ծառայությունն ավարտել է ու Արմավիր հասնելու համար իրեն գումար է պետք։ Այս մասին այսօր գրել էր «Հայկական ժամանակ» օրաթերթը:
Լուրեր.com-ը հարցի վերաբերյալ փորձեց պարզաբանում ստանալ ՀՀ ոստիկանությունից: Ոստիկանության հասարակայնության հետ կապի և լրատվության վարչության աշխատակից Արմեն Մալխասյանն ասաց. «Ոստիկանությունն անհեթեթությունները չի մեկնաբանում»:
Թերթի հրապարակման համաձայն` երեկ ոստիկանը մոտեցել է նաև «Հժ»-ի թղթակցին ու մարզ գնալու պատճառաբանությամբ 600 դրամ խնդրել։
Օրեր առաջ միևնույն պատճառաբանությամբ մի ոստիկան էլ մոտեցել էր լրագրող, իրավապաշտպան Արգիշտի Կիվիրյանին ու խնդրել 500 դրամ. «Մի քիչ առաջ փողոցում ինձ մոտեցավ մի ոստիկան և խնդրեց 500 դրամ՝ բացատրելով, որ նոր է ավարտել ծառայությունը, պետք է հասնի տուն, շրջան»,-ֆեյսբուքյան էջում գրառում էր արել Կիվիրյանը։
Երեկ մեր թղթակիցը Կիվիրյանի հետ կապ հաստատեց և նկարագրություններից պարզ դարձավ, որ խոսքը նույն երիտասարդ, կրտսեր ոստիկանի մասին է։ Վերջինս ենթադրաբար իսկապես Արմավիրի մարզից է, աշխատում է Երևանի բաժիններից մեկում և ամեն օր աշխատանքից հետո տուն հասնելու խնդիր ունի:
ՈՒՂԻՂ ԵԹԵՐ
Ամենադիտված 
Այնթափի դպրոցը սգում է աշակերտուհու մահը
