Ծերունի հայ գերու հարցում ադրբեջանցիները չգիտեն` ում հավատան` իրենց տեսածին, թե՞ ՊՆ-ին

Ադրբեջանական ԶԼՄ-ներում շարունակվում են Տավուշի Վերին Կարմիրաղբյուր գյուղի 77-ամյա բնակիչ Մամիկոն Տիգրանի Խոջոյանի մոլորվելու հետեւանքով շփման գիծը հատելուց հետո հունվարի 28-ին Թովուզի շրջանի Ալիբեյլի գյուղի տարածքում ադրբեջանցի գյուղացիների կողմից ձերբակալվելու, նրան ադրբեջանցի զինծառայողներին հանձնելու եւ ծեծի ենթարկվելու շուրջ քննարկումները:

Ադրբեջանական faktxeber.com լրատվական կայքը հայտնում է, որ գյուղացիների կողմից զինվորականներին հանձնվելուց հետո արված տեսանկարահանումներում երեւում է, որ հայ ծերունին բռնության է ենթարկվել, նրա ձեռքը կոտրված է եւ դեմքի ձախ հատվածում հարվածներից առաջացած կապտուկներ կան:

«Սակայն, Ադրբեջանի պաշտպանության նախարարությունը հերքում է հայ գերուն ծեծի ենթարկելու մասին պնդումները: Նախարարության մամուլի ծառայության ղեկավար Վագիֆ Դերգահլըն հայտնում է, որ ձերբակալված հայ դիվերսանտը վիրավորվել է հրազենի գնդակից, նա բռնվել է զինված եւ վիրավոր վիճակում, եւ որ այդ մասին կա նաեւ նախարարության պաշտոնական հաղորդագրությունը: Բայց, երկու օր առաջ ANS հեռուստաալիքի տարածած տեսանյութում հայ գերին ասում է, որ ձեռքը կոտրել է ընկնելու պատճառով: Բացի այդ, Ալիբեյլի գյուղի բնակիչները եւս ասում են, որ իրենք հային բռնել են սահմանը անցնելու ժամանակ: Ստացվում է, որ Մամիկոն Խոջոյանին բռնելու ժամանակ տեղացիների կողմից արված տեսապատկերները հակասում են երեկ երեկոյան նույն հեռուստաալիքի կողմից տարածված տեսանյութին: Ավելին, Ադրբեջանի ՊՆ-ը հունվարի 28-ին տարածած պաշտոնական հաղորդագրության մեջ հայտնել է, թե իբր. «Այսօր ժամը 15:00-ի շրջանում Թովուզի շրջանի Ալիբեյլի գյուղի ուղղությամբ հայկական հետախուզական-դիվերսիոն խումբը փորձել է անցնել զորքերի շփման գիծը: Պաշտպանության նախարարության առաջնագծում տեղակայված զորամիավորումների զգոնության արդյունքում թշնամու այդ փորձը կասեցվել է: Կարճ փոխհրաձգությունից հետո հետ քաշված թշնամու հետախուզական-դիվերսիոն խմբի ուղեկցորդ Մամիկոն Խոջոյանը զինված եւ վիրավոր վիճակում մեր զինվորների կողմից ձերբակալվել է»:

«Վերջում նշենք նաեւ, որ հայկական մամուլը պնդում է, որ Մամիկոն Խոջոյանը հոգեկան հիվանդ է»,- գրում է սեփական երկրի պաշտպանության նախարարության հաղորդագրության հետ իրենց տեսածի չհամընկնելուց բան չհասկացած ադրբեջանական կայքը:

Տավուշի սահմանամերձ Վերին Կարմիրաղբյուր գյուղի բնակիչ 77-ամյա Մամիկոն Տիգրանի Խոջոյանի անհետացման մասին գյուղում հայտնի էր դարձել հունվարի 28-ին ժամը 14:00-15:00-ի սահմաններում` գյուղում արարողության ժամանակ: Խոջոյանը երեք որդի եւ երեք դուստր ունի, սակայն, բնակվել է միայնակ: 77-ամյա գյուղացին առողջական խնդիրներ է ունեցել եւ վերջին 2-3 տարիներին հաշվառված է եղել ու գտնվել է բժիշկների վերահսկողության ներքո: Ադրբեջանի ՊՆ մամուլի ծառայությունը նրան «զինված դիվերսանտ» էր բնորոշել, իսկ Ադրբեջանի Պատանդների, անհայտ կորածների եւ գերիների հանձնաժողովի քարտուղար Շահին Սայիլովը նշել էր, որ Հայաստանի քաղաքացուն գետն անցնելիս Թովուզի շրջանի Ալիբեյլի գյուղի բնակիչները նկատել եւ հանձնել են ադրբեջանցի զինծառայողներին: