Հոլիվուդը ցնցված է ամերիկացի դերասան Ֆիլիպ Սեյմուր Հոֆմանի անակնկալ մահից

Հոլիվուդյան հայտնի դերասանի մահվան պատճառը, ում փետրվարի 2-ին մահացած են գտել Մանհեթենի շրջանի իր բնակարանում, կարող է լինել թմրադեղերի գերդոզավորումը: Այս մասին տեղեկացնում Է CNN հեռուստաալիքը:

Ըստ վերջինիս տվյալների՝ 46-ամյա Հոֆմանին հայտնաբերել են լոգասենյակում՝ ներարկիչը ձեռքին, իսկ բնակարանում գտել են հերոինին նմանվող նյութ: Տեղական զանգվածային լրատամիջոցների տվյալների համաձայն՝ Հոֆմանը վերջին տարիներին փորձում էր ազատվել թմրակախվածությունից:

Ինչպես նշում Է ԻՏԱՌ-ՏԱՍՍ-ը, դերասանը հիմնականում հայտնի էր երկրորդ պլանի իր դերերի շնորհիվ: 2006 թվականին Հոֆմանն «Օսկար» է ստացել «Կապոտե» ֆիլմում խաղացած գլխավոր դերի համար, իսկ 2012 թվականին ճանաչվել է Վենետիկի կինոփառատոնի լավագույն դերասանը` «Վարպետը» ֆիլմում կատարած երկրորդական դերի համար:

Դերասանն ուներ 10-ամյա մի տղա և հինգ և յոթ տարեկան երկու աղջիկ:

Գործընկերները սգում են բազմաթիվ երկրպագուների հետ՝ զորակցությանն խոսքեր գրելով Թվիթերում: Դերասանուհի Ջուլիանա Մուրը, որը Հոֆմանի հետ խաղացել է «Գիշերներ բուգի ոճով» և «Մագնոլիա» ֆիլմերում, նշել է, որ «իրեն շատ հաջողակ է համարում, քանի որ իրեն բախտ է վիճակվել աշխատել այդ արտասովոր մարդու հետ»: Թոմ Հենքսի խոսքով` որը հանգուցյալ դերասանի հետ նկարահանվել է «Չառլի Ուիլսոնի պատերազմը» կինոժապավենում, «այն օրը, երբ հեռացավ Հոֆմանը, դարձավ վատթարագույնը նրանց համար, ովքեր երբևէ աշխատել են նրա հետ, նա անպատմելի շնորհալի մարդ էր»:

«Ես բառեր չեմ գտնում ասելու, դա ահավոր է»,- գրել է «Մարտյան իդեր» ֆիլմի ռեժիսոր Ջորջ Քլունին, որտեղ խաղացել Է Հոֆմանը: Հանդիսականը Հոֆմանին ծանոթ է նաև «Տաղանդավոր միստեր Ռիբլի», «Ռոք-ալիք», «Մարդը, որ փոխեց ամեն ինչ» ֆիլմերից, նրա վերջին՝ Պլուտարքոս Հեվենսբիի դերից «Սոված խաղեր. Եվ կբռնկի բոցը» ֆիլմում: