Արցախում ցանկանում են Մինսկի խմբի ուշադրությունը հրավիրել Ադրբեջանի սադրիչ գործողություններին

Դեռեւս հստակ չէ, այս անգամ տարածաշրջան այցելության ժամանակ ԵԱՀԿ Մինսկի խմբի համանախագահները Ստեփանակերտ կայցելեն, թե ոչ: Համենայն դեպս, մինչ այս պահը նման հանդիպում ծրագրված չէ: Եթե համանախագահները այցելեն Ստեփանակետ, ապա ԼՂՀ նախագահ Բակո Սահակյանը կանդրադառնա ամենաարդիական խնդիրներին եւ հատուկ ուշադրություն կդարձնի սահմանում տեղի ունեցող իրավիճակին եւ Ադրբեջանի կողմից սադրիչ գործողություններին: «Արմենպրես»-ի հետ զրույցում ԼՂՀ նախագահի մամուլի խոսնակ Դավիթ Բաբայանն ասաց, որ ավանդույթի համաձայն Բակո Սահակյանը կներկայացնի ոչ միայն առկա իրավիճակը, քաղաքական ու ռազմական խնդիրները, այլեւ պաշտոնական Ստեփանակերտի դիրքորոշումը:

«Համանախագահներին բազմիցս ներկայացվել է Ստեփանակերտի դիրքորոշումը: Նախ, պետք է վերականգնվի բանակցային լիարժեք ձեւաչափն ու Ստեփանակերտը պաշտոնապես մասնակցի բանակցային գործընթացի բոլոր փուլերին` սկզբից մինչեւ վերջ: Պետք է բոլորի համար պարզ լինի, որ վերադարձ անցյալին չկա` ոչ կարգավիճակի, ոչ էլ սահմանների առումով: Մենք երբեք չենք կարող կասկածի տակ դնել մեր անկախությունն ու անվտանգությունը»,-Դավիթ Բաբայանը' հավելելով, որ Ստեփանակերտը կողմ է հակամարտության խաղաղ կարգավորմանը:

Նրա գնահատմամբ` հակամարտության վերջնական կարգավորումը շատ դժվար եւ տասնամյակների աշխատանք պահանջող գործընթաց է, սակայն դրան զուգահեռ բանակցությունները շարունակվում են կայունության եւ խաղաղության պահպանման համար, եւ այս ուղղությամբ պետք է ըստ արժանվույնս գնահատել համանախագահների ջանքերը:

ԵԱՀԿ Մինսկի խմբի համանախագահները փետրվարի 2-ի երեկոյան ժամանել են տարածաշրջան: Ամերիկացի համանախագահ Ջեյմ Ուորլիքի թվիթերում գրառում է կատարել, որ համանախագահները Ադրբեջանում եւ Հայաստանում ծրագրում են հանդիպել նախագահների հետ: «Մենք կհանդիպենք նախագահների հետ պարզելու` պատրաստ են արդյոք խաղաղությանն ընդառաջ քայլ կատարել»,-գրել է Ուորլիքն իր միկրոբլոգում: Ադրբեջանական «ԱՊԱ» գործակալության հաղորդմամբ` Բաքու են ժամանել ԵԱՀԿ ՄԽ Ֆրանսիայի համանախագահ Ժակ Ֆորը և ԱՄՆ համանախագահ Ջեյմս Ուորլիքը: Փետրվարի 3-ին համանախագահներ ը հանդիպում կունենան Ադրբեջանի նախագահ Իլհամ Ալիևի և արտաքին գործերի նախարար Էլմար Մամեդյարովի հետ: Բաքվի այցից հետո համանախագահները կայցելեն Երեւան: Հունվարի 24-ին Փարիզում տեղի ունեցավ Հայաստանի արտգործնախարար Էդվարդ Նալբանդյանի, Ադրբեջանի արտգործնախարար Էլմար Մամադյարովի, ԵԱՀԿ Մինսկի խմբի համանախագահների և ԵԱՀԿ գործող նախագահի անձնական ներկայացուցիչ Անջեյ Կասպրչիկի հանդիպումը: Պայմանավորվածություն ձեռք բերվեց համանախագահների` տարածաշրջան այցելելու վերաբերյալ. նրանք ցանկանում են կազմակերպել Հայաստանի եւ Ադրբեջանի նախագահների հանդիպումը: