ԱՄՆ-ն կարող է ձեռքը սեղանին խփել և հրամայել Ալիևին կանգ առնել, սակայն դա չի անում. ռուսաստանցի փորձագետ

ԵԱՀԿ Մինսկի խմբի համանախագահները կարող են դադարեցնել լարվածությունը հայ-ադրբեջանական սահմանին՝ հեռացնելով դիպուկահարներին: Բացի դրանից, ԱՄՆ-ն կարող է ձեռքը սեղանին խփել և հրամայել Բաքվի «գահին» ցմահ բազմելու ցանկություն ունեցող ադրբեջանական խանին՝ Ալիևին, կանգ առնել, սակայն դա չի անում՝ որոշ հաշվարկներից ելնելով: «Արմենպրես»-ի հետ զրույցում այդ մասին նշեց Սևծովյան-Կասպյան տարածաշրջանի քաղաքական և սոցիալական հետազոտությունների ինստիտուտի տնօրեն Վլադիմիր Զախարովը: «Եթե հիշում եք, 1990-ականների ռազմական գործողությունների սկզբում Մինսկի խումբը շատ բան արեց, փաստորեն դադարեցրեց պատերազմը: Կարդացեք Վ. Կազիմիրովի (այդ տարիներին Մինսկի խմբի ռուսաստանցի համանախագահ) գրքերը, որոնք լցված են ոչ թե հեքիաթներով, ինչը կարող ենք կարդալ ադրբեջանական կայքերում, այլ փաստաթղթերի բնօրինակների լուսանկարներով»,- նշեց Զախարովը:

Զախարովի խոսքով` ԱՄՆ-ն Ալիևից հնազանդություն չի պահանջում, որովհետև այժմ նա պետք է իրենց: Նրա համոզմամբ` Աֆղանստանից ամերիկյան զորքերի դուրսբերումը պետք է կատարվի Ադրբեջանի տարածքով՝ այդտեղ ստեղծելով Իրանի դեմ հնարավոր գործողությունների հենարան որովհետև, Արևմուտքի և Իրանի հաշտեցումը ցուցադրական է:

Արցախի դեմ ագրեսիա սանձազերծած Ադրբեջանը 1994-ին պարտվեց պատերազմում: Պատմության դասերը վատ սերտած այդ երկրի ղեկավարությունը շարունակում է հոխորտալ ռազմական ճանապարհով արցախյան հարցի լուծման ցանկության մասին՝ պարբերաբար իրականացնելով սադրիչ գործողություններ: ԼՂ հակամարտության կարգավորման բանակցային գործընթացով զբաղվում է ԵԱՀԿ Մինսկի խումբը, որի համանախագահների կազմում են Ֆրանսիան, Ռուսաստանն ու ԱՄՆ-ը: