Հայաստանի պատվիրակության ղեկավարը հայ-ադրբեջանական թեմայով զրույց է ունեցել ԵԽԽՎ նորընտիր նախագահի հետ

Եվրոպայի խորհրդի խորհրդարանական վեհաժողովի (ԵԽԽՎ) նորընտիր նախագահ Աննա Բրասորի այց Հայաստան չի սպասվում մոտ ժամանակներս: Այս մասին լրագրողների հետ զրույցում ասաց ԵԽԽՎ հայաստանյան պատվիրակության ղեկավար Դավիթ Հարությունյանը: «Մոտ ժամանակներս Հայաստան այց չի սպասվում, ավելի շուտ ակնկալվում է այցելություն Ադրբեջան, քանի որ այն ստանձնելու է նախարարների կոմիտեի նախագահությունը, և, բնականաբար, մի շարք միջոցառումներ սպասվում են Ադրբեջանում: Աննա Բրասորն էլ ի պաշտոնե կլինի այնտեղ»,- ասաց Դավիթ Հարությունյանը:

Նրա փոխանցմամբ` ԵԽԽՎ նորընտիր նախագահից շատ մեծ ակնկալիքներ չպետք ունենալ' հօգուտ Հայաստանի: «Միշտ նման կառույցներից պետք չէ հայամետ շատ մեծ ակնկալիքներ ունենալ, քանի որ նրանք փորձում են տանել հավասարակշռված մոտեցում, որը, տվյալ դեպքում, մեր կողմից չի ընդունվում»,-ասաց Դավիթ Հարությունյանը' հավելելով, որ պատվիրակությունը շարունակելու է աշխատանքը նախագահի և ԵԽԽՎ մյուս կառույցների հետ:

Հարցին, թե եղել են շփումներ ԵԽԽՎ նախագահի և հայկական պատվիրակության ներկայացուցիչների միջև, Դավիթ Հարությունյանը տեղեկացրեց, որ ինքն է զրույց ունեցել նորընտիր նախագահի հետ: «Որոշակի կոնտակներ եղել են ինձ հետ, որոնց մասին չէի ցանկանա մանրամասն բարձրաձայնել, բնականաբար, խոսքը վերաբերում է հայ-ադրբեջանական հարաբերություններին»,-հայտնեց Դավիթ Հարությունյանը:

Նա նաև տեղեկացրեց, որ Եվրոպայի խորհրդի գլխավոր քարտուղարի լիազորությունների ժամկետն է մոտենում ավարտին և շուտով' ամառային նստաշրջանի ժամանակ, տեղի է ունենալու ընտրություն: «Այս պահին երեք թեկնածուներ կան, նախարարների կոմիտեում է քննարկվելու նրանց հարցը, որից հետո հարցը ներկայացվելու է վեհաժողովի քվեարկությանը: Թեկնածուներն են գործող քարտուղար Յագլանդը, ով նորից է հավակնում այդ պաշտոնին, Ժան Կլոդ Մինյոնը, ով ԵԽԽ վեհաժողովի նախագահն էր, ձգտում է դառնալ գլխավոր քարտուղար, հաջորդը' Գերմանիայի արդարադատության նախարարն է, ով նախկինու մ եղել է ԵԽԽՎ պատվիրակ»,-հավելեց Դավիթ Հարությունյանը:

Եվրոպայի խորհրդի խորհրդարանական վեհաժողովի ձմեռային նստաշրջանի առաջին օրը ԵԽԽՎ պատգամավորները նախագահ են ընտրել Աննա Բրասորին, ով մրցում էր Ռոբերտ Ուոլթերի հետ: Աննա Բրասորը հավաքել է 165 ձայն, իսկ Ռոբերտ Ուոլթերը՝ 125: