Եթե ավտոբուս ես նստել, պիտի տոմս ունենայիր, չէ՞, բա ո՞ւր ա. Արմեն Ռուստամյանն անեկդոտ պատմեց ԱԺ-ում

«Կներեք, բայց մենք հիմք չունենք հավատալու այդ անկեղծությանը»: Այս մասին այսօր Ազգային ժողովում գազի հարցով խորհրդարանական ժամանակավոր հանձնաժողով ստեղծելու հարցի քննարկման ժամանակ ասաց ՀՅԴ խմբակցության ղեկավար Արմեն Ռուստամյանը:

Եվ նշեց, թե ինչու. «Ասեմ՝ ինչու, փորձեմ մեր մեծամասնության հիշողությունը թարմացնել: Այս ամենի մասին մենք խոսել ենք չորս տարի առաջ: Դաշնակցությունն այն ժամանակ բարձրացրեց հարց, որ ստեղծվի ժամանակավոր հանձնաժողով, որը պետք է ուսումնասիրեր ՀՀ գազամատակարարման համակարգի գործունեությունը: Չորս տարի առաջ ասել ենք, և հիմա դուք զարմանում եք, թե ինչ հարց եք բարձրացնում, որ եթե շուտ բերեիք, մենք կուսումնասիրենք, իրար հետ կաշխատեինք… դե աշխատեինք»,-ասաց Արմեն Ռուստամյանը` հավելելով, որ չորս տարի առաջ իրեն պատգամավորներից մեկն ասել է. «Լավ, ասում եք՝ պետք է ստեղծենք ժամանակավոր հանձնաժողով, եթե ասում է, դրա անհրաժեշտությունը մենք ունենայինք, մի՞թե չէինք ստեղծի, բայց եթե չենք ստեղծել, ուրեմն չկա չէ՞ դրա անհրաժեշտությունը»:

Ինչին ինքը` Ռուստամյանը, պատգամավորին պատասխանել է հետևյալ կերպ. «Ես էլ ասեցի, որ կներեք, ձեր ասածը հիշեցնում է մի հայտնի անեկդոտ: Մեկն իջնում է ավտոբուսից, ասում են տոմս ո՞ւր է, ասում է ի՞նչ տոմս, ասում են՝ դե ավտոբուսի տոմսը ցույց տուր, նա էլ պատասխանում է, թե ավտոբուսից չի իջել, մյուսն էլ ասում է՝ ո՞նց, ես տեսա, որ ավտոբուսից իջար, ասում է՝ լավ, արի հասկանանք, եթե ավտոբուս ես նստել, պիտի տոմս ունենայիր, չէ՞, բա ո՞ւր ա: Հիմա էս վիճակն ա ու էս տրամաբանությամբ մենք մինչև ո՞ւր պիտի շարժվենք:

Եթե չորս տարի առաջ գազի հարցով ստեղծվեր ժամանակավոր հանձնաժողով, Հայաստանն այս վիճակում չէր հայտնվի: Սա լավ օրինակ է հասկանալու համար, որ երբ պետական կառույցները չեն գործում, երկրում ստեղծվում է մի վիճակ, երբ սուսու փուս, գաղտագողի ինչ ասես կարող են անել»,-ասաց Ռուստամյանը: