Րաֆֆի Հովհաննիսյանը ժողովրդին ուղերձ ունի. հանդիպում փետրվարի 18-ին

«Ժառանգություն» կուսակցության փոխնախագահ Արմեն Մարտիրոսյանը կարծում է, որ կուսակցության առաջնորդ Րաֆֆի Հովհաննիսյանը քաղաքական հարթակներում երևում է այնքան, որքան մյուսները: Նախկին պատգամավորը զարմացած հարցնում է` ինչի ո՞վ է հիմա էդքան խոսում, երևում, որ Րաֆֆի Հովհաննիսյանն էլ պասիվ է կամ կորել է: «Նախագահի նախկին թեկնածուն, ոչ միայն Երևանում է, այլև փետրվարի 18-ին նախապաստրաստվում է ժողովրդի հետ հանդիպման: Նա չի սպասում, որ ինչ-որ մեկը խոսի, նոր ինքը խոսի, երբ պետք է` քաղաքական հարթակներում երևում է»: Այս մասին այսօր` լրագրողների հետ հանդիպման ժամանակ, ասաց Մարտիրոսյանը' հավելելով, որ երկու շաբաթից կայանալիք հանդիպման մանրամասները դեռևս հստակեցված չեն:

Կուսակցությունում դեռ չեն որոշել` դա կլինի հանրահավա՞ք, թե՞ այլ ձևաչափի հանդիպում: Հստակ է մեկ բան` հանդիպումը կկայանա Ազատության հրապարակում, Րաֆֆի Հովհաննիսյանն էլ ներկա կլինի: Թե ինչի մասին է խոսելու Հովհաննիսյանը, դեռևս պարզ չէ, սակայն կուսակցության փոխնախագահի համոզմամբ, Հովհաննիսյանը ժողովրդին ուղերձ ունի և այդ օրն այն կհրապարակի:

Անդրադառնալով կուսակցության ներսում տեղի ունեցող իրադարձություններին' Մարտիրոսյանն ասաց, որ ներկա դրությամբ «Ժառանգությունն» ամուր դիրքերում է և պատրաստ` իրականացնելու իր առջև դրված խնդիրները: Նրա գնահատմամբ, պատգամավոր Թևան Պողոսյանի աշխատանքը արդյունավետ է, պատգամավորական գործունեությունը շարունակելու կուսակցի որոշումն էլ բնութագրում է դրական և ճիշտ: «Մենք արդեն սովորել ենք, որ մեզ վրա ցեխ են շպրտում: Մեզ վրա ցեխ են շպրտում, բայց մենք շարունակում ենք աշխատել: Եթե անգամ Թեւան Պողոսյանն էլ խմբակցությունից դուրս գար, դա չէր կարողանա ջարդել կուսակցությունը»,-ասաց Մարտիրոսյանը` հավելելով, որ փետրվարի 3-ին խմբակցության նիստի ժամանակ որոշվել է Ռուբեն Հակոբյանին նշանակել ԱԺ խմբակցության ղեկավար: Ինչ վերաբերում է Զարուհի Փոստանջյանին, ապա «Ժառանգության» փոխնախագահն ասաց, որ նրա հարցը չի քննարկվել. «Կվերադառնա, այդ ժամանակ էլ կորոշենք»:

Մարտիրոսյանը մեծ խնդիր չի համարում նաև այն, որ կուսակցության ակտիվիստ Դանիել Իոանեսյանը դուրս է եկել կուսակցության շարքերից: Կուսակցության փոխնախագահը հավաստիացնում է, որ Իոանեսյանի նման բազմաթիվ երիտասարդներ ունեն, ովքեր պայքարում են հանուն նպատակի: Կուսակցությունում ոչ ողջունում, ոչ էլ քննադատում են Իոանեսյանի այս որոշումը: «Սեփական նախաձեռնությամբ ընդգրկվել է կուսակցության շարքերում, սեփական նախաձեռնությամբ էլ կուսակցությունից դուրս է գալիս: Մեկնաբանելու ոչինչ չկա»,- եզրափակեց նա: