«Ես, որպես մայր, մտահոգված եմ, թե ինչ կաթնամթերք է ուտում իմ երեխան». Հեղինե Բիշարյան

Ազգային ժողովի ՕԵԿ խմբակցության ղեկավար Հեղինե Բիշարյանն առաջարկում է ՏՄՊՊՀ-ին ուշադրություն դարձնել ոչ միայն ապրանքների գներին, այլ նաև որակին: Հեղինե Բիշարյանը Ազգային ժողովում ունեցած ելույթի ընթացքում նշեց.

«Մենք կարևորում ենք այս հանձնաժողովի աշխատանքը և հույս ենք տածում, որ այն անաչառ աշխատանք է իրականացնում, քանի որ սկսած սննդամթերքից՝ առնչվում է մնացած բոլոր ոլորտների հետ: Մենք ցանկանում ենք, որպեսզի ուշադրություն դարձվի նաև ապրանքների որակին, քանի որ սա նույնպես շատ կարևոր նշանակություն ունի մեզ համար»:

Բիշարյանն ասաց, որ ՕԵԿ-ը սննդի անվտանգության հարցում մի նախաձեռնությամբ է հանդես եկել, ըստ որի' կաթնամթերքի վրա պետք է նշվի, թե այն ինչ հումքից է բաղկացած և ինչ բաղադրիչներ են օգտագործվել դրանք պատրաստելիս: «Ես որպես մայր մտահոգված եմ, թե ինչ կաթնամթերք է ուտում իմ երեխան, և համոզված եմ, որ այս հարցով մտահոգված են բոլորը: Մենք արդեն երկու տարի է՝ խնդրում ենք, որպեսզի մեր առաջարկած օրինագիծը առաջին ընթերցումից հետո առաջ գնա»,- նշեց նա՝ հավելելով, որ կաթնամթերք արտադրող շատ ընկերություններ այլ միջոցներ են օգտագործում և այդպիսով մեծ գումարներ են աշխատում:

Բիշարյանն առաջարկեց նաև ուշադրություն դարձնել խանութներում վաճառվող սննդամթերքի պիտանելիության ժամկետներին, քանի որ քաղաքացիները մեծ կասկածներ ունեն վաճառվող սննդամթերքի ժամկետների վերաբերյալ: Նրա խոսքով՝ շատ չեն դեպքերը, երբ խանութներում վաճառվում են ժամկետնանց ապրանքներ:

ՏՄՊՊՀ նախագահ Արտակ Շաբոյանն Ազգային ժողովում ներկայացնում է հանձնաժողովի 2014թ. գործունեության ծրագիրը: