Գագիկ Ծառուկյանը Սերժ Սարգսյանի հետ կմեկնի Սոչի

«Հրապարակ»-ը գրում է.

«Վաղը նախագահական ինքնաթիռը կուղեւորվի դեպի Սոչի՝ համատեղելով անհամատեղելին. Գագիկ Ծառուկյանը կնստի ոչ միայն Սերժ Սարգսյանի կողքին, այլեւ սպորտի նախարար Յուրի Վարդանյանի: Յուրի Վարդանյանի «ջրերը» նույն առվով չեն հոսում ոչ միայն Ծառուկյանի, այլեւ բռնցքամարտի ազգային հավաքականի նոր մարզչի հետ:

Բռնցքամարտի ֆեդերացիայի նախագահ, ԱԺ պատգամավոր Արթուր Գեւորգյանը հավաքականի մարզիչ է նշանակել 70-ականների բռնցքամարտի լեգենդ Դավիթ Թորոսյանին: Ըստ մեր տեղեկությունների` Յու. Վարդանյանն առաջարկել է չնշանակել նրան, այլապես ինքը չի ֆինանսավորի հավաքականին: Համապատասխանո՞ւմ են լուրերն իրականությանը' փորձեցինք ճշտել նախորդ օրը:

Յուրի Վարդանյանի հեռախոսին պատասխանեց գործավարը, խոստացավ ճշտել, հետ զանգել, ինչն էլ երկու օր շարունակ չարեց: Ճի՞շտ է, որ Ձեր հարաբերությունները 70-ականների մյուս լեգենդ Յու. Վարդանյանի հետ բանի նման չեն' հարցրինք Դավիթ Թորոսյանին: «Մենք իրար հետ խնդիրներ չունենք»,- խուսանավեց Թորոսյանը: Ասում են' նա փողը չի փոխանցելու: «Չէ, որեւէ խնդիր չի եղել…»,- հերքեց ու չցանկացավ շարունակել: Ի դեպ, Դավիթ Թորոսյանը, ըստ մեր տեղեկությունների, Սերժ Սարգսյանի համակուրսեցին է՝ 70-ականների բանասիրական ֆակուլտետի: Փաստորեն, բանասիրականը ոչ միայն նախագահներ, այլեւ բռնցքամարտիկներ է տվել»: