«Հիմա ես սիրո՞ւն տղամարդ եմ, թե՞ չէ». սոցիալական հարցերի հանձնաժողովի ղեկավարը` պարտադիր կուտակային կենսաթոշակային համակարգի մասին

«Հրապարակ»-ը գրում է.

Պարտադիր կուտակային կենսաթոշակային համակարգի օրենքը գովերգող պատգամավորները, որոնք մինչեւ 1974 թվականն են ծնվել, այսինքն՝ պարտավոր չեն ընդգրկվել այդ համակարգում, բայց կարող են կամավոր ընդգրկվել՝ օրինակ ծառայելու եւ օրենքը քարոզելու համար, ծանր վիճակում են հայտնվում, երբ լրագրողները նրանց այդ մասին հարց են ուղղում:

Եթե այդքան լավ բան է, ինչո՞ւ չեք ընդգրկվում այդ համակարգում՝ տրամաբանական հարց են առաջադրում նրանց: Նրանք կամ պապանձվում են, կամ ագրեսիվ հարձակվում հարց տվողի վրա: Այսինքն՝ իրենք չեն ուզում որոշում կայացնել, բայց մնացածների որոշելու իրավունքն ուզում են սահմանափակել:

ՀՀԿ-ական Տաճատ Վարդապետյանը, օրինակ, արագ նետեց՝ «ես 66 թիվ եմ, ինձ չի վերաբերում», ու շտապ հեռացավ: Բավականին օրիգինալ գտնվեց սոցիալական հարցերի հանձնաժողովի ղեկավար Հակոբ Հակոբյանը: Լսելով մեր հարցը, զգաստ կանգնեց ու ժպտալով հարցրեց. «Հիմա ես սիրո՞ւն տղամարդ եմ, թե՞ չէ»:

«Դա ի՞նչ կապ ունի կուտակայինի հետ»: Կրկին լայն ժպտալով՝ ասաց. «Հիմա ես սիրո՞ւն տղամարդ եմ, թե՞ չէ, հը՞, դե ասա»: Ուզում էր ասել, թե յուրաքանչյուրն ինքն է որոշում՝ ինչն է լավ, ինչը՝ վատ: Այսինքն, դա նույնն է, որ մարդկանց մի մասին կարելի է պարտադրել այն կարծիքը, որ Հակոբ Հակոբյանը ՀՀԿ-ի ամենասիրուն պատգամավորն է, իսկ մյուսներին'ընտրելու հնարավորություն տալ: Օրենքին կողմ քվեարկող պատգամավորներն էլ իրենց սրամտություններով հաստատում են օրենքի պարտադիր բաղադրիչի բոլոր առումներով անհեթեթ լինելու հանգամանքը: