Մարտի 1-ին զոհված տասը անմեղ քաղաքացիներն իրենցը չեն. «համախմբված» ընդդիմություն

ԱԺ քառօրյայի երկրորդ օրն սկսվեց եւ շարունակվեց գազային կրքերով: Թե կուլիսներում, թե նիստերի դահլիճում «ՀայՌուսգազարդի» 20 տոկոսի վաճառքի, ինչպես նաեւ հանրությունից գաղտնի կուտակած անհասկանալի պարտքի՝ 300 միլիոն դոլարի մասին իսկությունը հասկանալու նպատակով ժամանակավոր հանձնաժողով ստեղծելու նպատակահարմարության քննարկումներն էին ընթանում:

Ոչ իշխանական չորս խմբակցությունները` ՀԱԿ, ԲՀԿ, ՀՅԴ եւ «Ժառանգություն», ԱԺ բարձր ամբիոնից նույն շեշտադրությամբ ու պատճառաբանություններով հիմնավորեցին նման հանձնաժողովի ստեղծման օրհասական անհրաժեշտությունը: Նրանցից շատերը, հաշվի առնելով նախադեպերը, վստահ են, որ հանձնաժողովները ոչինչ չեն փոխելու, քանի որ երկրում նման առքուվաճառքն իրականացրել է ոչ լեգիտիմ իշխանությունը եւ նույն ձեռագրով շարունակելու է, բայց քանի որ գլոբալ հարցերի շուրջ միասնականություն հնարավոր չէ ձեւավորել, ապա նման հարցերով հնարավոր է գոնե թեժ պահել դաշտը՝ ցույց տալով, թե իբրեւ ԱԺ-ում ինչ-որ բան արվում է ընդդեմ իշխանության հանցագործությունների:

Իսկ կոնկրետ հարցերի դեպքում համախմբված այս ընդդիմությունն այլ առիթներով դժվար թե կարողանա համախմբվել: Ասենք՝ մեկ ամիս անց, մարտի 1-ի հերթական տարելիցին կազմակերպվող հանրահավաքին այսօրվա համախմբումից հետք էլ չի մնա, քանի որ ողջ ընդդիմությունը դրան չի մասնակցի: Ոմանք կասեն, որ 2008 թվականի մարտի 1-ի ողբերգությունն իրենց հետ կապված չէ, բռնություններով ու կեղծված ընտրություններով ձեւավորված իշխանության դեմ պայքարում զոհված տասը անմեղ քաղաքացիներն իրենցը չեն: 

Մանրամասները` «Հրապարակ»-ի այսօրվա համարում: