ԵՄ-ն և ՅՈՒՆԻՍԵՖ-ը կփորձեն կանխել աշխատանքային միգրացիան Հայաստանի չորս մարզերում

Հայաստանում Եվրամիության պատվիրակությունը և ՅՈՒՆԻՍԵՖ-ը կիրագործեն սոցիալական ծրագրեր, որոնք նպատակ ունեն նվազեցնելու Լոռու, Տավուշի, Գեղարքունիքի և Շիրակի մարզերի աշխատանքնային միգրանտների և նրանց համայնքների սոցիալական խոցելիությունը։ 2012 թվականին մեկնարկած ծրագրով այս տարի նախատեսվում է չորս թիրախային մարզերում առնվազն 190 բժիշկների և առնվազն 380 միգրանտների ընտանիքների համապատասխան ուսուցում, ինչպես նաև հանրային իրազեկման արշավների անցկացում։

Ինչպես լրագրողների հետ հանդիպման ժամանակ նշեց ծրագրի համակարգող Վարյա Մերուժանյանը, կստեղծվեն չորս մարզային կենտրոններ, որոնք կաշխատեն զարգացնել և ամրապնդել համայնքների և Սփյուռքի կազմակերպությունների հետ կապը՝ նպաստելով թիրախային մարզերի զարգացմանը։ «Ծրագրի իրականացման առաջին տարում 4 թիրախային մարզերում 50 սոցիալական դեպք վարողներ ստացել են անհրաժեշտ կարողություններ ու ռեսուրսներ՝ միգրանտների ընտանիքները բացահայտելու, գնահատելու և արձանագրելու համար, որի արդյունքում մոտ 1000 միգրանտ ընտանիք ընդգրկվել է սոցիալական դեպքի վարման աշխատանքներում։ Դեպք վարողներն այն մարդիկ են, որ պետք է փորձեն ընտանիքի հետ ընդհանուր լուծումներ գտնել։ Դեպքի վարման մեթողաբանությունը մշակվել է ՄԱԿ-ի կողմից»,-ասել է Մերուժանյանը։

Աշխատանքի և սոցիալական հարցերի նախարարության ներկայացուցիչ Աստղիկ Մինասյանը նշեց, որ ծրագրի նպատակն է բացահայտել այն ընտանիքների խնդիրները, որտեղ կա թեկուզ մեկ միգրանտ։ «Ընտանիքներին օգնելու համար ստեղծվեց աջակցության ցանց, որտեղ կան նաև պետական աշխատակիցներ։ Կարծում ենք, մեզ պետք է միանան նաև քաղաքացիական հասարակության անդամներն ու հասարակական կազմակերպությունները»,-ասաց Մինասյանը։