Բրյուս Լիի մասին հայ ռեժիսորի ֆիլմը կնկարահանվի Արցախում

Արևելյան մարտարվեստների վարպետ, կինոդերասան, պրոդյուսեր և սցենարիստ Բրյուս Լիին նվիրված հայ ռեժիսորի ֆիլմը կնկարահանվի Արցախում: Արմատներով արցախցի ռեժիսորի նախաձեռնությամբ ֆիլմի նկարահանումը կսկսվի ամռանը' հունիս-հուլիսին: Կինոռեժիսոր, սցենարիստ և պրոդյուսեր Արա Առուշը (Առուշանյան) Հայաստանի ազգային կինոկենտրոնի աջակցությամբ Արցախի սրտում կստեղծի նոր աշխարհ` «Անունս Բրյուս Լի է» ֆիլմի միջոցով: Էքշն ժանրի լիամետրաժ խաղարկային կինոնկարը տարիքային սահմանափակում չի ունենա: Արա Առուշի համոզմամբ' այն հաճույքով կդիտեն թե փոքրերը և թե մեծերը: Ռեժիսորը վստահ է, որ ֆիլմը հաջողություն կունենա և կտարբերվի Բրյուս Լիի մասին պատմող այլ ֆիլմերից: «Այս ֆիլմն ընդհանրապես տարբերվելու է Բրյուս Լիի մասին բոլոր ֆիլմերից, ինչպես նաև ֆիլմերից ընդհանուր առմամբ, որովհետև այն լի է նոր լուծումներով և բացահայտումներով, որոնց դուք ականատես կլինեք էկրաններին: Ֆիլմը շատ երկրպագուներ կունենա: Ուրախալի է, որ այդ երկրպագուներից շատերը կլինեն հենց երիտասարդները, քանի որ ֆիլմի համար ուղենիշ են հենց նրանք: «Անունս Բրյուս Լի է» ֆիլմը չի պատմում արևմուտքի, ամերիկյան արժեքների մասին: Ոչ, այն փիլիսոփայական և հոգևոր կինոնկար է, որը զարգացնում է և խթանում երիտասարդների ինքնաճանաչողությունը և ինքնագիտակցումը: Դա շատ կարևոր է: Ընդհանուր առմամբ' ֆիլմը շատ խոր իմաստ ունի»,- «Արմենպրես»-ի թղթակցի հետ զրույցում նշեց Արա Առուշը:

Մարտարվեստի լեգենդը ստեղծել է նաև մեծ փիլիսոփայություն, որը Առուշի համար չափազանց հետաքրքիր է և ուշագրավ: Ֆիլմում գլխավոր դերում հանդես կգա արցախաբնակ 14-ամյա Միխայիլ Դոկինը, ով զբաղվում է Արևելյան մարտարվեստով: «Միխայիլին գտա քասթինգի միջոցով: Շատ հեռանկարային տղա է, մեծ ապագա է ունենալու: Նա կնկարահանվի նաև մի շարք ֆիլմերում: Մենք Միխայիլ Դոնկին անունը դեռ կլսենք»,- համոզված է կինոռեժիսորը:

Բացի Միխայիլից, ֆիլմում կխաղան նաև ռուսական կինոյի աստղերը: Դեռևս պարզ չէ, թե ով կմարմնավորի Բրյուս Լիին: Արա Առուշը մի քանի դերասանների հետ է բանակցում' այդ թվում նաև սերիալներում Բրյուս Լիին արդեն երկու անգամ մարմնավորած չինացի դերասան Դենի Չանի հետ:

Հայ կինոռեժիսորն այլ ծրագրեր էլ ունի: Պատրաստվում է նկարահանել նաև մի շարք այլ ֆիլմեր' դրանք ներկայացնելով միջազգային հարթակներում:

Կինոռեժիսոր, սցենարիստ, պրոդյուսեր Արա Առուշը (Առուշանյան) ծնվել է 1974 թվականին' Ստեփանակերտում: 1999-ից նկարահանել է տեսահոլովակներ: Հիմնադրել է Digidez Studio և KenigArts Pictures ընկերություններ: Ռուսաստանի և Հայաստանի քաղաքացի լինելով' բնակվում է Մոսկվայում և Երևանում: «Որսորդը»' նրա ռեժիսորական դեբյուտը, ցուցադրվել է մի շարք հայտնի կինոփառատոններում, այդ թվում' Կաննի ՄԿՓ-ի «Կարճամետրաժ ֆիլմերի անկյուն» ծրագրում, Մումբայի Ջագրան ԿՓ-ում և Մերիլենդի «Ֆրեդերիկ» ԿՓ-ում (ԱՄՆ):

Պատրաստեց Ռոզա Գրիգորյանը