Պետությունն ի վիճակի չէ իր վրա վերցնել հավելյալ ֆինանսական պարտավորություններ

«168 ժամ»-ը գրում է. «Կառավարությունը դիմել է նախագահ Սերժ Սարգսյանին՝ ԱԺ-ում ավելի քան տասը տարի գտնվող «Բռնությամբ կատարված հանցագործությունների զոհերին փոխհատուցելու մասին» եվրոպական կոնվենցիան հետ կանչելու առաջարկով: Այս կոնվենցիան նախատեսում է, որ չբացահայտված հանցագործությունների զոհերի իրավահաջորդների փոխհատուցումը պետք է կատարի պետությունը:

ՀԱԿ խմբակցության անդամ Գագիկ Ջհանգիրյանն ԱԺ-կառավարություն հարցուպատասխանի ժամանակ երեկ հարցրել է, թե որն է նման որոշման պատճառը:

Արդարադատության նախարար Հրայր Թովմասյանը պատասխանել է, որ պետությունն ի վիճակի չէ իր վրա վերցնել հավելյալ ֆինանսական պարտավորություններ, որոնք առաջանալու են կոնվենցիայի վավերացման դեպքում:

Կոնվենցիան Հայաստանի կողմից ստորագրվել է 2003թ. և մինչև օրս չի վավերացվել: Սա նշանակում է, որ Հայաստանի կառավարությունն ընդունում է, որ այդ տասը տարիների չի կարողացել ստեղծել բավարար ֆինանսական աղբյուրներ' բռնության զոհ դարձած իր քաղաքացիներին փոխհատուցում վճարելու համար, իսկ այն հետ կանչելու որոշումը նշանակում է, որ այդ միջոցները չեն լինելու նաև ապագայում:

Մանրամասները՝ թերթի այսօրվա համարում։