Հայաստանում օրական մինչև 2500 մարդ պալիատիվ բուժօգնության կարիք ունի

Հասարակություն 6 Փետրվար, 2014 11:44

Հայաստանը պալիատիվ բուժօգնության զարգացման նպատակով առավել մատչելի է դարձնում ցավազրկող դեղերը, վերացնում է դեղերը նշանակող բժիշկների սահմանափակումները: Համապատասխան փոփոխություններ են կատարվել «Թմրամիջոցների և հոգեմետ նյութերի մասին» օրենքում, որոնք հնարավորություն կտան պալիատիվ բուժօգնության կարիք ունեցողներին բարելավելու կյանքի որակը:

Օրենսդրական փոփոխություններով նախատեսվում են կրթական ծրագրեր, որոնք բժիշկներին վստահություն կտան և կբացատրեն այն մեխանիզմները, որոնք պահպանելով նրանք կարող են թմրամիջոցներ և հոգեմետ դեղեր նշանակել դրա կարիքն ունեցողներին»,-«Արմենպրես»-ի հետ զրույցում ասաց ՀՀ առողջապահության նախարարության աշխատակազմի ղեկավար Սուրեն Քրմոյանը:

Քրմոյանի խոսքով` նախարարության առաջիկա կարևորագույն խնդիրներից է պալիատիվ խնամքին նվիրված չորս պիլոտային ծրագրերի շարունակության ապահովումը: «Նշված ծրագրերը տեղակայված են «Վ. Ֆանարջյանի անվան ուռուցքաբանության ազգային կենտրոն» ՓԲԸ-ում, «Արարատի բժշկական կենտրոն» ՓԲԸ-ում, «Երևանի Մ. Հերացու անվան պետական բժշկական համալսարան» ՊՈԱԿ-ի թիվ 1 համալսարանական կլինիկայում, «Վանաձորի թիվ 1 Լ. Արեշյանի անվան հիվանդանոցային համալիր» ՓԲԸ-ում: Ներկայումս աշխատում ենք միջոցներ գտնել, որպեսզի պատրաստենք նաև մասնագետներ հեռավոր մարզերում' մասնավորապես Տավուշում և Սյունիքում»,-ասաց նա:

Առողջապահության նախարարության աշխատակազմի ղեկավարը նշեց, որ Հայաստանում օրական հաշվարկով մինչև 2500 մարդ պալիատիվ բուժօգնության կարիք ունեն: Նրանց գերակշիռ մասը տառապում է օնկոլոգիական հիվանդություններով: «Կան նաև այլ հիվանդություններ, որոնք պահանջում են հակացավային բուժում, այդ թվում' վիրահատական միջամտություններից հետո, տրավմատիզմի հետ կապված հիվանդները: Հիվանդները պալիատիվ բուժօգնության կարիք կարող են ունենալ մի քանի օրից մինչև մի քանի շաբաթ, ավելի ծանր հիվանդները' մինչև մի քանի ամիս»,-ասաց նա:

Քրմոյանի խոսքով` ամոքիչ բուժօգնություն ստացող հիվանդներին տրվող հոգեմետ նյութերը թանկ դեղերի շարքը չեն դասվում: Օրենսդրական նոր փոփոխություններով, սակայն, կլուծվի դրանց հասանելիության խնդիրը:

Հայաստանը հաջողությամբ ընդունել է ամոքիչ բժշկության հայեցակարգը և վերանայել թմրամիջոցների մասին օրենքը' հիվանդների համար ափիոնային ուժեղ դեղերի հասանելիությունը հնարավոր դարձնելու նպատակով: Մեր երկրում ցամոքիչ խնամքի համար անհրաժեշտ համարվող «Պերօրալ մորֆին» դեղամիջոցը ներառվել է կենտրոնացված դեղերի ցանկ: «Թմրամիջոցների և հոգեմետ (հոգեներգործուն) նյութերի մասին» ՀՀ օրենքը կարգավորում է թմրամիջոցների և հոգեմետ (հոգեներգործուն) նյութերի շրջանառության հետ կապված հարաբերությունները, ինչպես նաև քաղաքացիների առողջության, պետության և հասարակության անվտանգության ապահովման նպատակով սահմանում է դրանց ապօրինի շրջանառությունը կանխարգելելու պետական քաղաքականության իրավական հիմքերը և թմրամոլության դեմ պայքարի հիմնական միջոցները: Այն ընդունվել է 2002 թվականի դեկտեմբերի 26-ին: