Ադրբեջանը Սոչիի օլիմպիադան սկսել է գլխիվայր շրջված դրոշով (լուսանկար)

Սոցիալական ցանցերում լուսանկար է տարածվել, որում Սոչիում Ձմեռային օլիմպիադայում Ադրբեջանի կողմից հանդես եկող մարզիկները կանգնած են' ձեռքներին երկրի գլխիվայր շրջված դրոշը: Այս մասին հայտնում են ադրբեջանական ԶԼՄ-ները:

Սոչիում Ադրբեջանի պատվիրակության ղեկավար Քենուլ Նուրուլլաևան այդ խայտառակության հետ կապված մեկնաբանել է, թե «այնքան զբաղված են եղել օլիմպիական քաղաքում Ադրբեջանի դրոշի տեղադրմամբ, որ չեն հասցրել ուշադրություն դարձնել դրան»:

Սոչիի Ձմեռային օլիմպիական խաղերում Ադրբեջանը ներկայացնելու է չորս արտասահմանցի մարզիկ: Դա գեղասահքի Յուլիա Զլոբինա-Ալեքսեյ Սիտնիկով զույգն է` Ռուսաստանից, ինչպես նաև լեռնադահուկորդներ' իտալուհի Գայա Բասսանին և ավստրիացի Պատրիկ Բրախները:

Ադրբեջանի դրոշը միջազգային արարողությունների ժամանակ հաճախակի է գլխիվայր շրջված ներկայացվել: Նման դեպքեր տեղի են ունեցել անգամ Ադրբեջանի նախագահ Իլհամ Ալիևի արտասահմանյան այցերի պաշտոնական ընդունելությունների ժամանակ: