Սիրիայում մարտնչող ադրբեջանցի ահաբեկիչները հայտնել են, որ պայքարում են հայերի, իրանցիների և ռուսների դեմ

Ինչպես հայտնում է «Avropa.info» կայքը, Սիրիայի իշխանությունների դեմ կառավարական պայքար մղող ադրբեջանցի ահաբեկիչները հանդես են եկել հայտարարությամբ, որում ասվում է, որ նրանք պայքարելու են հայերի, իրանցիների և ռուսների դեմ:

Պետք է նշել, որ ադրբեջանցի զինյալները Սիրիայում կռվելու գաղափարական բացատրություն մինչև օրս դեռ չունեին:

Ըստ մոջահեդների կայքերի տեղեկատվության՝ ադրբեջանցի ահաբեկիչ Ֆուրքան Ազերի խոսքով` իր կոչը հասցեագրված է մոջահեդներին, ովքեր ճնշման և բռնության են ենթարկվել հայերի, իրանցիների, ռուսների և բռնակալ Ասադի դեմ մղվող պայքարում:

Նշենք, որ ըստ ԱՊԱ գործակալության՝ Սիրիայում 2014 թվականի սկզբից արդեն մոտ 16 ադրբեջանցի ահաբեկիչ է սպանվել:

Հիշեցնենք, որ Ադրբեջանի և միջազգային ահաբեկչական խմբերի համագործակցությունը սկսվել է դեռ 1990-ականներին: Այդ ընթացքում, երբ Լեռնային Ղարաբաղի հակամարտությունն ուներ ազգային-քաղաքական խնդիրներ, Ադրբեջանի իշխանությունները փորձում էին նրան հաղորդել կրոնական ուղղվածություն: Այս քաղաքականության նպատակն այն էր, որ Ղարաբաղյան պատերազմի մեջ ներգրավվեր ողջ իսլամական աշխարհի «ջիհադի մարտիկներին»։ Արդյունքում օտարերկրյա կրոնական կազմակերպությունները, իսլամական ծայրահեղական կառույցները՝ Աֆղանստանի («Գուլբեդին Հիքմեթյարի» խմբավորումը), Թուրքիայի ( «Գորշ գայլեր»), Չեչնիայի (Բասաևի, Ռադուևի խմբավորումներ) հեշտությամբ ներթափանցեցին Ադրբեջան:

Լեռնային Ղարաբաղում ընթացող ռազմական գործողությունների ընթացքում միջազգային ահաբեկչական կազմակերպություններին ռազմամթերքի և սպառազինության տրամադրումն ադրբեջանական կողմը վերցրել էր իր վրա: 1992 թվականին չեչեն գրոհայինների խումբը ժամանեց Ադրբեջան և մայիսին մասնակցեց Շուշիի, իսկ 1993 թ. ամռանը՝ Աղդամի ռազմական գործողություններին: Բասաևի խմբավորումը վերջիններից էր, ով կրելով ծանր պարտություններ, հայերի ճնշմամբ` լքեց ռազմական դիրքերը: