«Կինը բնության հրաշալի հորինվածքներից է». Ռոման Բաբայան

Մեր զրուցակիցն է Գաբրիել Սունդուկյանի անվան ազգային ակադեմիական թատրոնի դերասան Ռոման Բաբայանը.

-«Կյանքը թատրոն է, մարդիկ դերասաններ»,- ասում է Շեքսպիրը, ի՞նչ կասեք Դուք:

-Մենք, իսկապես, ամեն տեղ ու անընդհատ խաղում ենք դերեր. այդպես է պահանջում հասարակությունը, որում մենք ապրում ենք, Դուք այժմ խաղում եք լրագրողի դեր, իսկ ես՝ դերասանի, տանը մեզ այլ դերեր են սպասվում, ընկերների հետ՝ այլ և այսպես շարունակ, չենք կարող ինքներս մեզ հետ միայնակ մնալ. դա այդքան էլ հեշտ չէ ու պատահում է շատ հազվադեպ:

-Ըստ Ձեզ՝ ի՞նչ է տալիս կամ ի՞նչ պետք է տա թատրոնն իր հանդիսատեսին:

-Թատրոնը ժամերի ընթացքում կարող է սովորեցնել ու մարդուն տալ այն, ինչ չի կարող տալ անգամ շատ ծավալուն մի գիրք: Քարոզելով հավերժական արժեքներ՝ մարդուն «օգնում է» մնալ մարդ:

-Չեք ափսոսո՞ւմ, որ դարձել եք դերասան:

-Դերասանությունն իմ մասնագիտական կյանքն է, ընտրությունս արել եմ դեռ վաղ հասակից ու երբևէ չեմ զղջացել դրա համար:

-Կյանքը Ձեր աչքերով, ինչպիսի՞ն է այն:

-Առաջին հերթին անվերջ պայքար… Ինչպես կասեր Գյոթեն՝ կյանքը բնության ամենահրաշալի հորինվածքն է:

-Ի՞նչն եք կարևորում կանանց մեջ:

-Շարունակելով վերը նշված մտքով՝ կավելացնեմ՝ կինն էլ բնության հաջորդ հրաշալի հորինվածքն է: Իսկ կնոջ մեջ առհասարակ կարևորում եմ իմաստությունն ու խելացիությունը, ինչպես նաև կողքի մարդուն հասկանալու ու նեցուկ լինելու ունակությունը:

-Ո՞ր երկրում կուզեիք ապրել:

-Հայաստանն իմ երկիրն է, որը ես շատ եմ սիրում, իսկ եթե հեքիաթային պատասխանեմ, ապա կուզեի ապրել այնտեղ, որտեղ կիրականանան իմ բոլոր ցանկությունները:

-Մարդիկ միշտ այնքան շատ են խոսում սիրո մասին, ի՞նչ է Ձեզ համար սերը:

-Եթե մարդը չի սիրում, նա կյանքի իմաստը չի հասկանա, սերը հենց այդ իմաստն է…

-Ի՞նչպես կմեկնաբանեք ազատություն հասկացությունը:

-Ազատությունը նախ և առաջ պատասխանատվություն է քո և քո շրջապատի մարդկանց առջև, ցավոք, այսօր շատերը չեն հասկանում՝ իրականում ինչ է ազատությունը ու, մեղմ ասած, շփոթում են այլ երևույթների հետ:

-Ձեզ երջանիկ մարդ համարո՞ւմ եք:

-Այո´, երջանիկ եմ. ինձ համար թանկ մարդիկ իմ կողքին են:

-Ըստ Ձեզ՝ ո՞րն է հաջողության հասնելու իրապես գործող բանաձևը, ինքներդ ունե՞ք հաջողության սեփական բանաձև:

-Ցանկացած գործում հաջողության հասնելու միակ բանաձևը անկեղծությունն է: