Գաղջ մթնոլորտի տեսության հեղինակ Սերժ Սարգսյանը երեկ թարմացրեց իր ստեղծած «թևավոր» արտահայտությունների «ցանկը»

Գաղջ մթնոլորտի տեսության հեղինակ և իր «թևավոր» արտահայտություններով բանահյուսական նոր «արժեքներ» ստեղծած Սերժ Սարգսյանը երեկ թարմացրեց «ցանկը»: Կոնդ թաղամասի բնակիչները, որոնք 7 տարի է, անտուն են մնացել, երեկ հավաքվել էին Սարգսյանի նախագահական առանձնատան մոտ՝ եւս մեկ անգամ իրենց խնդրի մասին հիշեցնելու: Գրում է «Ժողովուրդ» օրաթերթը:

Սարգսյանը, բարեբախտաբար, այս անգամ չասաց «եկել ես, որ ի՞նչ անես», այլ հարցրեց. «Եթե ես եմ ձեր նախագահը, պիտի ի՞նձ մեղադրեք»: Հավանաբար, նա մոռացել է, որ ՀՀ Սահմանադրության 49-րդ հոդվածի համաձայն՝ «Հանրապետության նախագահը պետության գլուխն է: Հետևում է Սահմանադրության պահպանմանը, ապահովում է օրենսդիր, գործադիր և դատական իշխանությունների բնականոն գործունեությունը»:

Այսինքն՝ եթե բնակիչների սոցիալական խնդրի անմիջական պատասխանատուն այլ մարմին է, միևնույն է, դրա բնականոն գործունեությունը կրկին ապահովում է նախագահը: Բացի այդ՝ հիշեցնենք Ս. Սարգսյանի նախընտրական ծրագիրը. «Ապահով հայրենիք և ապահովված ընտանիքներ՝ սրանք անհրաժեշտ նախադրյալներն են՝ կյանքի կոչելու «ԱՊԱՀՈՎ ՀԱՅԱՍՏԱՆ» նպատակադրումը»: Եթե նույնիսկ ընդունենք, որ Ս. Սարգսյանն իր նախընտրական ծրագիրը չի հիշում, Սահմանադրությանն էլ լավ ծանոթ չէ և մարդկանց ունեցած խնդիրների համար իրեն մեղավոր չի համարում, այդ դեպքում ո՞վ է պատասխանատու:

Կրկին նայենք Սահմանադրությունը. 89-րդ հոդվածի 5-րդ կետն ասում է. «Կառավարությունն իրականացնում է պետական քաղաքականությունը գիտության, կրթության, մշակույթի, առողջապահության, սոցիալական ապահովության և բնության պահպանության բնագավառներում»:

Այսինքն՝ Սերժ Սարգսյանն ասում է՝ ինձ հանգիստ թողե՛ք, մեղադրե՛ք կառավարությանը՝ Տիգրան Սարգսյանին…: