Քաղաքագետն առանձնացնում է Հարավային Կովկասում լուրջ ազդեցություն ունեցող հինգ գործոն

Վերջին տարիներին իրավիճակը Հարավային Կովկասում փոխվել է, ազդեցություններն այլ են և այսօր Հարավային Կովկասի խնդիրները, ազդեցություններն ու լուծման ուղիները ոչ թե տարածաշրջանի ներսում են, այլ նրա շուրջ: «Կովկաս» ինտիտուտի տնօրեն, քաղաքագետ Ալեքսանդր Իսկանդարյանը լրագրողների հետ հանդիպման ժամանակ առանձնացրեց արտաքին քաղաքականության մի քանի գործոններ, որոնք այս կամ այն կերպ ազդեցություն են ունենում Հարավային Կովկասի վրա: Քաղաքագետը կարևորում է Իրան-Արևմուտք հարաբերությունների լավացումը, որը ոչ միայն դրական է, այլև բխում է տարածաշրջանի ու հատկապես Հայաստանի շահերից: «Հայաստանում դրա մասին քիչ են խոսում, սակայն երբ Իրանի և Արևմուտքի հարաբերությունները լավանան, տարածաշրջանում այլ իրավիճակ կստեղծվի Հայաստանի համար»,- ասաց քաղաքագետը:

Նրա խոսքով` այսօր տարածաշրջանային գործընթացների վրա լուրջ ազդեցություն է թողնում Թուրքիան: Այդ երկրում արդեն հասկացել են, որ Դավութօղլուի «Զրո խնդիր հարևանների հետ» թեզիսը ձախողվել է, և այժմ Թուրքիան ունի «Զրո հարևան առանց պրոբլեմի» ու այն, ինչ կատարվում է Թուրքիայում, ամբողջովին կփոխի Թուրքիան, ինչը բնականաբար կփոխի նաև տարածաշրջանում իր ազդեցությունը: «Այս պահին շատ կարեւոր է սիրիական հակամարտությունը եւ նրա լուծումը: Սա ոչ միայն տարածաշրջանի, այլեւ աշխարհի գերտերությունների համար է դարձել կարևորագույն հարցեր»,- ասաց Իսկանդարյանը:

Թեպետ Ուկրաինան Հայաստանին սահմանակից չէ, սակայն այն, ինչ այսօր կատարվում է Կիեւում, շեշտակի ազդեցություն է թողնելու տարածաշրջանում: Քաղաքագետի գնահատմամբ` ոչ ռուսական, ոչ արևմտյան, ոչ էլ հայկական մամուլը չի լուսաբանում այն, ինչ կա: Կողմերից յուրաքանչյուրն իր շահն է հետապնդում, հոդվածներն էլ մեծ առումով Ուկրաինայի հետ որևէ առնչություն չունեն: Վերջին  ամենամեծ գործոնը' Ռուսաստանի Դաշնությունն է, նրա հետ հարաբերությունները, նրա օրակարգն ու արտաքին քաղաքականությունը:

Ըստ քաղաքագետի` արտաքին գործոնների շնորհիվ իրավիճակը տարածաշրջանում դարձել է շատ ավելի բարդ, իսկ խնդիրները թվում են ավելի անլուծելի: