Արցախի երիտասարդները նամակ են հանձնել Անջեյ Կասպրշիկին

Լեռնային Ղարաբաղի Հանրապետություն այցելած ԵԱՀԿ գործող նախագահի անձնական ներկայացուցիչ, դեսպան Անջեյ Կասպրշիկին Արցախի երիտասարդները հայտնել են իրենց մտահոգությունը վերջին շրջանում տեղի ունեցող ղարաբաղա-ադրբեջանական սահմանային ընդհարումների վերաբերյալ' հայտարարելով որ դրանք Ադրբեջանի սադրիչ գործողությունների արդյունքն են: Երիտասարդները դեսպանին են ներկայացրել իրենց անհանգստությունը ԵԱՀԿ Մինսկի խմբ ի համանախագահների դրսեւորած ոչ համարժեք գնահատականի առնչությամբ: Նրանք պահանջել են, որ սահմանային գծում տեղի ունեցող ցանկացած միջադեպ ենթարկվի անկախ հետաքննության, եւ պատասխանատու կողմը կրի համախատասխան պատիժ:

Արցախյան «Ապառաժ» կայքի հաղորդմամբ, արցախցի երիտասարդները Կասպրշիկի հետ զրույցում շեշտել են, որ սահմանային գծում իրավիճակը կշարունակի լարված մնալ, եթե միջնորդ կողմը շարունակի պահպանել անհամարժեք պահվածք:

«Մենք կանենք հնարավորինից ավելին՝ սահմանային միջադեպերի կանխման համար»,-երիտասարդների բազմաթիվ հարցերին հակիրճ պատասխանել է Անջեյ Կասպրշիկը: Երիտասարդները նրան են փոխանցել Արցախի երիտասարդների եւ երիտասարդական 8 կազմակերպությունների նամակն ուղղված իրեն ու ԵԱՀԿ Մինսկի խմբի համանախագահներին, Կասպրշիկն էլ խոստացել է այն փոխանցել համանախագահներին:

Ստորեւ ներկայացնում ենք Արցախի երիտասարդների նամակն ուղղված ԵԱՀԿ գործող նախագահի անձնական ներկայացուցիչ, դեսպան Անջեյ Կասպշիկին:

«Մենք՝ Արցախի երիտասարդներս, գտնում ենք, որ վերջին շրջանում տեղի ունեցող ղարաբաղա-ադրբեջանական սահմանային ընդհարումները, որոնք ուղղակի արդյունք են դրբեջանի կողմից հրահրման, եւ որոնց արդյունքում թափվել է անմեղ արյուն, եւ Ադրբեջանի նման պահվածքը, մեր համոզմամբ, ուղղակի հետեւանք է միջազգային հանրության եւ, հատկապես, ԵԱՀԿ Մինսկի խմբի համանախագահների կողմից դրսեւորած ոչ համարժեք գնահատականի: Առ այդ, պահանջում ենք, որ սահմանային գծում տեղի ունեցող որեւէ միջադեպ ենթարկվի անկախ հետաքննության եւ պատասխանատ ու կողմը կրի համախատասխան պատիժ: Ի դեպ, այս պահանջը մեր տեղեկությամբ, բազմիցս հնչել է թե` հայկական կողմի, եւ թե' ԵԱՀԿ Մինսկի խմբի համանախագահների կողմից, որին անհիմն եւ անհեթեթ պատճառներով միշտ ընդդիմացել է Ադրբեջանը:

Հարգելի պարոն Կասպրշիկ, որպես ԵԱՀԿ գործող նախագահի անձնական ներկայացուցչի, հարկ ենք համարում Ձեզ հիշեցնել, որ սահմանային գծում իրավիճակի լարումը եւ անմեղ երիտասարդների սպանությունները կշարունակվեն, եթե միջնորդ կողմը շարունակի պահպանել իր անհամարժեք պահվածքը: Վերջին հաշվով, որպես ԵԱՀԿ գործող նախագահի անձնական ներկայացուցիչ եւ, տեւական ժամանակ լինելով իրավիճակին անմիջական հաղորդակից, դուք պետք է Ձեր ջանքն ու եռանդը չխնայեք Մինսկի խմբի համանախագահներին իրականությունը ներկայացնելու եւ պատասխանատվության զգացումը փոխանցելու համար:

Պարոն Կասպշիկ, մեզ համար խաղաղությունն ու մարդկային կյանքը բարձրագույն արժեքներ են: Հանուն այդ արժեքների պահպանման, որի երաշխավորն է Արցախի Հանրապետության անկախությունը, մենք պատրաստ ենք շարունակելու մեր ծնողների եւ եղբայրների որդեգրած ճանապարհը՝ չերկնչելով խոչընդոտներից ու դժվարություններից:

Մենք մեր երկրի ներկան ենք, ապագան եւ մեր իրավունքների տերը»: