Ռաֆայել Հակոբյանցի մահվան կապակցությամբ ստեղծվել է կառավարական հանձնաժողով

ՀՀ արվեստի վաստակավոր գործիչ, Երևանի Կոմիտասի անվան պետական կոնսերվատորիայի պրոֆեսոր, օպերային երգիչ Ռաֆայել (Ռաֆիկ) Հակոբյանցի մահվան կապակցությամբ, ՀՀ վարչապետի որոշմամբ ստեղծվել է թաղման կառավարական հանձնաժողով: Ինչպես «Արմենպրես»-ին տեղեկացրին ՀՀ մշակույթի նախարարության հասարակայնության հետ կապերի բաժնից, փետրվարի 7-ին ՀՀ մշակույթի նախարարի տեղակալ Արթուր Պողոսյանի գլխավորությամբ կայացել է կառավարական հանձնաժողովի նիստը:

Ռ. Հակոբյանցի քաղաքացիական հոգեհանգիստը տեղի կունենա փետրվարի 8-ին, ժամը 18:00-20:00-ին, Կուզնեցովի փ., շենք 11, բնակարան 4 հասցեում: Վերջին հրաժեշտը կտրվի փետրվարի 9-ին, ժամը 12:00-14:00-ին, Կոմիտասի անվան պետական կոնսերվատորիայում: Հուղարկավորությունը կկատարվի նույն օրը, Նորքի գերեզմանատանը:

Փետրվարի 6-ին, 72 տարեկան հասակում վախճանվել է ՀՀ արվեստի վաստակավոր գործիչ, Կոմիտասի անվան պետական կոնսերվատորիայի պրոֆեսոր Ռաֆիկ Հակոբյանցը: Հակոբյանցը սկզբնական երաժշտական կրթությունը ստացել է հատուկ մասնագիտական երաժշտական դպրոցի ջութակի դասարանում: 1962-67թթ. սովորել և ավարտել է Երևանի Կոմիտասի անվան պետական կոնսերվատորիայի ջութակի բաժինը: 1973թ. սովորել է նույն կոնսերվատորիայի ակադեմիական երգեցողության բաժնում՝ մեծանուն երգչուհի Գոհար Գասպարյանի ղեկավարությամբ: 1963-1969թթ. աշխատել է պետական ֆիլհարմոնիայի, ապա՝ Հայաստանի ռադիոյի և հեռուստատեսության սիմֆոնիկ նվագախմբերում: 1970թ., որպես մեներգիչ, աշխատել է Ալ. Սպենդիարյանի անվան օպերայի և բալետի ազգային ակադեմիական թատրոնում, կատարել ավելի քան 40 տարբեր դերերգեր: 1995թ. աշխատել է Երևանի Կոմիտասի անվան պետական կոնսերվատորիայում, որպես վոկալի դասատու: 2002թ. ստացել է դոցենտի գիտական կոչում, 2009թ.՝ պրոֆեսորի:

Հակոբյանցի սաները մասնակցել են միջազգային և հանրապետական հեղինակավոր մրցույթների՝ արժանանալով 40-ից ավելի մրցանակների: