ԼՂՀ ՊԲ-ն այն հիմնական գործոնն է, որը թույլ չի տալիս լայնամասշտաբ ռազմական գործողությունների վերսկսում

«Արքայազն Հարոլդ» ուսանողական թերթի թղթակիցը զրուցել է ԱՄՆ-ում եւ Կանադայում Արցախի ներկայացուցիչ Ռոբերտ Ավետիսյանի հետ, հետաքրքրվել Լեռնային Ղարաբաղի Հանրապետության զարգացմամբ եւ Լեռնային Ղարաբաղի հակամարտության կարգավորման ներկա իրավիճակով:

Հարցազրույցում պատմական էքսկուրս կատարելով եւ ներկայացնելով Արցախյան ազատագրական շարժումը, պարտադրված պատերազմն ու այդ պատերազմում հայ ժողովրդի հաղթանակը, Ռոբերտ Ավետիսյանը ներկայացրել է հակամարտության կարգավորման գործընթացը, բանակցությունների ընթացքն ու ԵԱՀԿ Մինսկի խմբի համանախագահների գործունեությունը:

«Չնայած այն հանգամանքին, որ Լեռնային Ղարաբաղը չճանաչված հանրապետություն է, իր գործառույթներով, քաղաքացիական հասարակությամբ, տնտեսական զարգացման տեմպերով եւ ճիշտ կառավարման արդյունքում ունի այն բոլոր ինստիտուտները, որ անհրաժեշտ է կոչվելու պետություն: Անկախություն ձեռք բերելուց օրվանից սկսած ԼՂՀ-ում համապետական նշանակության բազմաթիվ ընտրություններ են անցկացվել, որոնցից յուրաքանչյուրը միջազգային դիտորդները գնահատել են բաց, թափանցիկ եւ բարձր մակարդակի»,- ասել է նա:

Անդրադառնալով Հայաստանի եւ ԼՂՀ համագործակցությանը, Ռոբերտ Ավետիսյանը շեշտել է, որ Հայաստանի եւ Արցախի բնակիչներն ունեն նույն ծագումը, պատմությունն ու մշակույթը, սակայն պատմական ճակատագիրը նրանց ստիպել է տասնամյակներ շարունակ առանձին ապրել: «Այսօր նրանք միասին են: Ղարաբաղյան շարժման առաջին օրվանից Հայաստանը աջակցել է Ղարաբաղի' անկախության հասնելու ձգտմանը: Հայաստանը բազմիցս պատրաստակամություն է հայտնել սատարելու Ղարաբաղի ժողովրդին»:

«Հաշվի առնելով Ադրբեջանի նախագահի նախկինում կատարած ռազմատենչ հայտարարությունները կարե՞լի է սպասել ռազմական ագրեսիայի նաեւ 2014թ.-ին»,- լրագրողի հարցին ի պատասխան' Ռոբերտ Ավետիսյանն ասել է, որ Ադրբեջանի ագրեսիվ քաղաքականությունը, սպառազինումն ու պատերազմ վերսկսելու կոչերը լուրջ վտանգ են տարածաշրջանում խաղաղության եւ անվտանգության պահպանման համար:

«Հակահայկականությունը դարձել է Ադրբեջանի պետական քաղաքականությունը: Դա ավելի է խորացնում երկու ժողովուրդների միջեւ առկա անդունդը եւ նվազագույնի հասցնում վստահությունը: Քանի դեռ Ադրբեջանի ոչ կառուցողական քաղաքականության եւ հրադադարի ռեժիմի խախտման դեպքերի առնչությամբ միջազգային հանրությունը համարժեք գնահատական չի տվել, Ադրբեջանի կողմից ագրեսիայի վերսկսման վտանգ միշտ կլինի»:

Անդրադառնալով Արցախի բանակին, ԱՄՆ-ում եւ Կանադայում Արցախի ներկայացուցիչն ասել է, որ ԼՂՀ-ում մեծ ուշադրություն են դարձնում բնակչության անվտանգությանը: «ԼՂՀ բանակը բավարար է, որպեսզի երկիրը կարողանա պահպանել իր սահմանների անառիկությունը եւ համարժեք պատասխան տա ցանկացած ռազմական ագրեսիայի: Տարածաշրջանում ուժերի դասավորությունը հավասարակշռված է: ԼՂՀ Պաշտպանության բանակն այն հիմնական ուժն է, որը թույլ չի տալիս լայնամասշտաբ ռազմական գործողությունների վերսկսում»,- ասել է Ռոբերտ Ավետիսյանը:

1994թ. պարտադրված պատերազմում հաղթանակ տանելուց հետո Հայաստանը Ադրբեջանի հետ կնքեց զինադադարի պայմանագիրը եւ կողմերը պայմանավորվեցին խնդրի կարգավորումը ռազմական ոլորտից տեղափոխել դիվանագիտական դաշտ եւ բանակցությունների միջոցով այն լուծել: Սակայն ադրբեջանական կողմը բազմիցս խախտել է հրադադարի ռեժիմն ու սահմանին ստեղծել լարվածությունը: Հիմնախնդրի կարգավորման շուրջ բանակցություններն ընթանում են ԵԱՀԿ Մինսկի խմբի համանախագահների (Ռուսաստան, ԱՄՆ, Ֆրանսիա) միջնորդությամբ: Ներկայումս բանակցություններն ընթանում են 2007թ. նոյեմբերին համանախագահների կողմից ներկայացված մադրիդյան առաջարկությունների հիման վրա: