Սերժ Սարգսյանի պահվածքը Սոչիում. անգամ Լուկաշենկոն ոտքին «բզեց», բայց ապարդյուն...

Երեկ Սոչիում տեղի ունեցավ ձմեռային օլիմպիական խաղերի բացման արարողությունը, որը ոչ միայն ճոխ էր ու տպավորիչ, այլ նաեւ բարձրաճաշակ: Գրում է «Հայկական Ժամանակ»-ը:

 Արարողության գեղարվեստական մասում բեմադրված ներկայացումը նկարագրում էր Ռուսաստանի պատմությունն ու մշակույթը: Ու դրանով կազմակերպիչներին հաջողվել էր աշխարհին ներկայացնել մի այլ Ռուսաստան, պատկերավոր ասած' արվեստի եւ մշակույթի Ռուսաստանը: Արարողությունը գոնե ժամանակավորապես երկրորդ պլան մղեց այդ խաղերի կազմակերպման վերաբերյալ բացահայտված սկանդալային փաստերը, մասնավորապես, օլիմպիական համալիրի կառուցման ժամանակ փոշիացած տասնյակ միլիարդավոր դոլարների եւ շինարարության որակի մասին: Միայն այդ արարողությունը դիտելով' համոզվում ես, որ Ռուսաստանը հզոր է իր պատմությամբ, մշակույթով, արվեստով ու հենց դրանով նա կարող է գրավել իր ուրույն` ազդեցիկ տեղը աշխարհում: Ցավոք, այսօր Ռուսաստանը փորձում է դա անել իր տանկերով, հրթիռներով, ԿԳԲ-ով ու գազի գնով: Պուշկինի, Չայկովսկու, Դոստոեւսկու, Տոլստոյի Ռուսաստանը շատ ավելի հզոր է ու հեռանկարային, քան լենին-բրեժնեւ-պուտինյան Ռուսաստանը:

Հ.Գ. Սոչիի Օլիմպիադայի բացման արարողությունից հայ հեռուստադիտողի հիշողության մեջ կմնա նաեւ Սերժ Սարգսյանի պահվածքը, երբ նա նստած դիմավորեց ՀՀ դրոշով անցնող մեր օլիմպիականներին: Նրան ոտքի կանգնեցնելու ապարդյուն փորձ արեց անգամ կողքը նստած Բելառուսի նախագահ Ալեքսանդր Լուկաշենկոն՝ ոտքին «բզելով»: