«Ելք չկա» հայկական քրեական դրաման ցույց կտա կյանքի ամենատարբեր իրավիճակներից ելքերը

Կինոսերները փետրվարի 15-ից Երևանի բոլոր կինոթատրոններում հնարավորություն կունենան դիտել «Ելք չկա» գեղարվեստական լիամետրաժ ֆիլմը: Փետրվարի 8-ին հրավիրված ասուլիսում «Ելք չկա» ֆիլմի պրոդյուսեր, RecTime production ընկերության հիմնադիր Կամո Ունանյանը նշեց, որ ֆիլմում անհավանական ոչինչ չկա և սյուժեն հիմնված է իրական կյանքի վրա:

«Ֆիլմը դիտելիս շատերը կհիշեն պատմություններ հենց իրենց կյանքից»,- ասաց Ունանյանը: Նա` պատասխանելով լրագրողների հարցին, չհերքեց, որ հանդիսատեսը հոգնել է քրեական պատմություններից, սակայն «Ելք չկա»-ն իր ժանրով քրեկան դրամա է, որը քարոզում է այլ գաղափարներ` սեր, ընկերություն:

Դերասան Արմեն Մարությանն էլ նշեց, որ ֆիլմի սյուժեն էականորեն տարբերվելու է քրեական սերիալների առաջարկածից:

«Ֆիլմում անդրադարձ է կատարված նաև ընկերասիրության, մարդկային լինելու թեմային: Այն ցույց է տալիս, թե երիտասարդ սերունդը ինչպես կարող է ապրել»,- պատմեց Մարությանը' հավելելով, որ այս ֆիլմում ևս մարմնավորում է բացասական հերոսի, թեև իրական կյանքում ինքը բարի է:

Ֆիլմը հովանավորներ և աջակիցներ չի ունեցել, և նկարահանման բոլոր ծախսերը հոգացել է RecTime production ընկերությունը:

«Ելք չկա»-ն կառանձնանա նաև այն բանով, որ կոմպոզիտոր Էդմոնդ Մակարյանի հեղինակած երաժշտությունը' ֆիլմի սաունդթրեքըը, հնչում է Հայաստանի պետական երիտասարդական նվագախմբի կատարմամբ:

Նվագախումբը կատարել է ֆիլմի երաժշտությունը «Արամ Խաչատրյան» համերգասրահում: Ֆիլմի նկարահանումները կատարվել են Հայաստանում և Վրաստանում: 83 րոպե տևողությամբ կինոժապավենում, բացի սկսնակ դերասաններից, նկարահանվել են անվանի արտիստներ Արտաշես Ալեքսանյանը, Արմեն Մարությանը: Կինոժապավենի ռեժիսորն է Վահե Սայանը, սցենարի հեղինակը՝ Հարություն Ղուկասյանը: Ֆիլմի երկրրոդ' ռեփային սաունդթրեքը Նարեկ Պետրոսյանի կատարմամբ է:

Առաջիկայում ֆիլմը կցուցադրվի ԱՄՆ-ում, Բելգիայում, Հոլանդիայում, Ղազախստանում և Ռուսաստանում, ինչպես նաև Հայաստանի մարզերում: