«Աքիլեսի» ղեկավարն ահազանգում է ԱՊՊԱ սխալ տուգանքների մասին

Ավտովարորդների իրավունքների պաշտպանությամբ զբաղվող հասարակական կազմակերպությունն ահազանգում է, որ Հայաստանում մի քանի տասնյակ վարորդներ վերջին օրերին ստացել են 5 հազար դրամ տուգանքներ' մեքենաներն ապահովագրած չլինելու պատճառով' չնայած մեքենաներն ապահովագրված են եղել: «Աքիլես» ՀԿ-ի նախագահ Էդուարդ Հովհաննիսյանի կարծիքով` ամբողջ խնդիրն ԱՊՊԱ բյուրոյում առկա սխալ տվյալներն են, որոնցից օգտվելով էլ ճանապարհային ոստիկաններն ուղարկում են տուգանքների մասին ծանուցագրերը:

«Ճանապարհային ոստիկանությունն ասում է, որ իրենք տուգանում են ըստ ԱՊՊԱ բյուրոյի տեղեկությունների. նրանց բազաներից հանում են խախտումները և վարորդներին ուղարկում որոշումները»,-նշեց Հովհաննիսյանը՝ հավելելով, որ երեք օրվա մեջ 30 բողոք է եղել ապահովագրված լինելու, բայց տուգանք ստանալու հետ կապված: Միաժամանակ Հովհաննիսյանը պարզաբանեց, որ ԱՊՊԱ բյուրոն էլ իր հերթին տվյալներն ստանում է ապահովագրական ընկերություններից, և իրենց խոստացել են մինչև շաբաթվա վերջը պարզաբանել այդ հարցը: Հովհաննիսյանի խոսքով` անհիմն տուգանք ստացած վարորդները կարող են բողոքել ԱՊՊԱ բյուրո, որից հետո այդ որոշումը չեղյալ կհայտարարվի:

«Աքիլեսի» ղեկավարը բարձրաձայնեց նաև ոլորտում առկա մեկ այլ խնդրի մասին: «Մարդիկ կան, ովքեր 10-15 տարի առաջ վաճառել են մեքենաները լիազորագրերով, բայց ոչ պայմանագրով և այժմ ստանում են տուգանքներ՝ ԱՊՊԱ չկատարելու վերաբերյալ»,- նշեց նա: Մասնագետն ընկերությունների կողմից ավտոմեքենաները չապահովագրելու դեպքում խորհուրդ տվեց գրավոր դիմել այդ ընկերությանը, պատասխան չստանալու դեպքում հայտնել «Աքիլես» ՀԿ: «Միայն գրավոր պետք է լինի պատասխանը, որպեսզի մենք կարողանանք օգնել մարդկանց»,- նշեց Հովհաննիսյանը: