«Հայկական Մոսկվան». ռուսական «Կուլտուրա» ալիքը հաղորդում է նվիրել Մոսկվայի հայ համայնքին (տեսանյութ)

Ռուսական «Կուլտուրա» հեռուստաընկերության «Մոսկվայով քայլելիս» (Пешком по Москве) հաղորդաշարի վերջին հաղորդումը նվիրվել է Մոսկվայի հայկական համայնքին, որը չորրորդն է բնակիչների թվաքանակով: Մոտ 30 րոպե տևողությամբ տեսնյությում պատմվում է հայկական համայնքի մասին և թե ինչ հետք են հայերը թողել բազմէթնիկ մայրաքաղաքում: Ճանաչողական շրջայցը սկսվում է Հայկական նրբանցքից, ապա ներկայացվում է ՀՀ դեսպանատունը, հայկական նորակառույց վանքային համալիրը, գերեզմանոցը, մեծանուն ճարտարապետ Ալեքսանդր Թամանյանի կառուցած իշխան Շերբետովի տունը և Արամ Խաչատրյանի հուշարձանը: «Մոսկվայի հայկական համայնքը միշտ շատ համախմբված է եղել: Հայերն այստեղ ունեցել են իրենց դպրոցները, ուսումնարանները, թերթերը, առանձին գերեզմանոցները և երեք եկեղեցի»,- պատմում է հաղորդման հեղինակը' Միխայիլ Ժեբրակն իր «Հայկական Մոսկվա»-ի ժամանակ:

Պաշտոնական տվյալներով' Մոսկվայում բնակվում է 106 հազար հայ: Նշվում է, որ Մոսկվայի հայերը հեշտությամբ հարմարվել են տեղի կյանքին և ինտեգրվել ռուսական հասարակությանը: Հայ վաճառականները Կիտայ-քաղաքում (Китай-городе) առևտրով են զբաղվել դեռ 15-րդ դարից սկսած: Մյուս կողմից, նրանք չեն մոռացել իրենց հայկական արմատները: