Ադրբեջանական բանակում «անզգուշության» հետևանքով զինվոր է վիրավորվել

Ադրբեջանական բանակում «դժբախտ պատահարների» կամ «անզգուշության» հետևանքով շարունակում են զոհվել, վիրավորվել զինվորներ: Հերթական դեպքը գրանցվել է Ադրբեջանի պաշտպանության նախարարությանը ենթակա զորամասերից մեկում: Այս մասին հայտնում է ադրբեջանական «ԱՊԱ» գործակալությունը:

20-ամյա Զամին Մալիքօղլու Մամեդովը` խախտելով անվտանգության կանոնները, «պատահմամբ» կրակել է ծառայակցի վրա: Վիրավորված Էլնուր Սահիբօղլու Ահմեդովն անմիջապես հոսպիտալացվել է: Ադրբեջանի ՊՆ-ն հաստատել է այս փաստը: 

Ադրբեջանի լրագրողների ռազմական հետազոտությունների «Դոկտրինա» կենտրոնի կողմից զանգվածային լրատվական միջոցների հաղորդագրությունների հիման վրա անցկացված մոնիթորինգի արդյունքներով` այս տարվա հունվարին Ադրբեջանի անվտանգության և պաշտպանության հատվածի կորուստը կազմել է 7 զինծառայող:

2013 թ. Ադրբեջանի անվտանգության և պաշտպանության հատվածի կորուստը կազմել է 81 զինծառայող, որոնցից 72-ը զոհվել են ոչ մարտական պայմաններում, 99 զինծառայող էլ վիրավորվել կամ վնասվածք է ստացել: