Սոչի 2014. մեդալների համար ամենաշատ դրամական հավելավճարներ կստանան Ղազախստանի ներկայացուցիչները

Սոչիի Ձմեռային օլիմպիական խաղերում իր մարզիկներին ամենաառատաձեռն դրամական հավելավճարները խոստացել են Ղազախստանի, Լատվիայի, Իտալիայի, Բելառուսի, Էստոնիայի և Ուկրաինայի Ազգային օլիմպիական կոմիտեները (ԱՕԿ), տեղեկացնում է ԻՏԱՌ-ՏԱՍՍ-ը:

Ղազախստանցի ատլետները, եթե ոսկի նվաճեն, կարող են իրենց պարգևների համար Ազգային օլիմպիական կոմիտեից ակնկալել 250 հազար դոլար, արծաթի համար՝ 150 հազար դոլար, բրոնզի՝ 75 հազար դոլար:

Լատվիացի մարզիկները՝ համապատասխանաբար՝ 192,8 հազար, 96,4 հազար և 67,5 հազար դոլար: Իտալացիները՝ 189,8 հազար, 101,7 հազար և 67,8 հազար դոլար: Բելառուսները՝ 150 հազար, 75 հազար և 50 հազար դոլար: Էստոնացիները՝ 138,5 հազար, 92,3 հազար և 60,6 հազար դոլար: Ուկրաինացիները՝ 125 հազար, 80 հազար և 55 հազար դոլար:

Ռուսաստանի հավաքականի մարզիկները կստանան 4 միլիոն ռուբլի (մոտավորապես 113,2 հազար դոլար) ոսկու համար, 2,5 միլիոն ռուբլի (70,8 հազար դոլար)՝ արծաթի և 1,7 միլիոն ռուբլի (48 հազար դոլար)՝ բրոնզի համար:

Շվեյցարիայի ԱՕԿ-ը պարգևները սահմանել է 88,6 հազար, 77,5 հազար և 66,45 հազար դոլարի չափով:

Ֆրանսիացի ատլետներին խոստացվել է 67,8 հազար, 27,1 հազար և 17,6 հազար դոլար: Հոլանդացիներին՝ 40,6 հազար, 30,5 հազար և 20,3 հազար դոլար: Ֆիններին՝ 40,6 հազար, 20,3 հազար և 13,5 հազար դոլար: Ճապոնացիներին՝ 29,3 հազար, 19,6 հազար և 9,8 հազար դոլար:

Ամերիկացի չեմպիոններին և մրցանակակիրներին հասնում է 25 հազար, 15 հազար և 10 հազար դոլար: Գերմանացիների վարձատրումներն ավելի համեստ են՝ 20,3 հազար, 13,5 հազար և 10,15 հազար դոլար:

Կանադայի ԱՕԿ-ը հաշվարկել է, որ ատլետների համար միանգամայն բավարար խթան կդառնան 17,9 հազար դոլարը ոսկու համար, 13,4 հազարն՝ արծաթի և 8,9 հազարը՝ բրոնզի համար:

Էլ ավելի քիչ են ավստրալացիների հավելավճարները՝ 13 հազար, 8,7 հազար և 6,5 հազար դոլար:

Ոչ մի կարգի դրամական վարձատրություն չեն ստանա, մասնավորապես, Մեծ Բրիտանիայի, Նորվեգիայի, Շվեդիայի և Խորվաթիայի մարզիկները: Ինչպես պարզաբանել է Շվեդիայի ԱՕԿ-ի ներկայացուցիչ Բիեռն Ֆոլինը, «մենք մեզ տրամադրված բոլոր փողերը ծախսում ենք Օլիմպիադաներին մարզիկների պատրաստման համար, մասնավորապես, ամեն տարի 8 միլիոն եվրո (11 միլիոն դոլար) է ծախսվում մարզական ճամբարների, մարզիչների և ատլետներին տրվող դրամական լրավճարների վրա»:

Ավստրիայի կառավարությունն օլիմպիական չեմպիոններ դարձած իր մարզիկներին է տալիս 17 արծաթե դրամ՝ 21,6 հազար դոլար արժողությամբ: Արծաթե և բրոնզե մրցանակակիրներն ստանում են համապատասխանաբար 13-ական և 11-ական նույնպիսի մետաղադրամներ:

Ատլետների խթանման հետաքրքրական ծրագիր է մշակել Հարավային Կորեայի կառավարությունը, որը ոսկու համար խոստացել է 62 հազար դոլար, արծաթի համար՝ 51,67 հազար և բրոնզի՝ 36,17 հազար: Մարզիկներին առաջարկվում է կատարել ընտրություն. այդ փողն ստանալ միանգամից ամբողջությամբ կամ համաձայնել ցմահ «օլիմպիական թոշակի»:

Երկրորդ տարբերակի դեպքում չեմպիոններին մինչև նրանց կյանքի վերջը ամսական կվճարվի 923 դոլար, արծաթե մրցանակակիրներին՝ 692 դոլար, բրոնզե մրցանակակիրներին՝ 484 դոլար: Եվ հարավկորեացի ատլետների մեծ մասը նախապատվությունը տալիս է հավելավճարների ստացման այս սխեմային: