Քաղաքագետը չի կիսում ՄՄ-ին անդամակցելով ինքնիշխանությունից զրկվելու տեսակետները

Քաղաքագետ Երվանդ Բոզոյանը համաձայն չէ հնչող կարծիքներին, թե Մաքսային միությանն անդամակցելով, Հայաստանը կորցնում է ինքնիշխանությունը: Փետրվարի 10-ին լրագրողների հետ հանդիպմանը քաղաքագետը նշեց, որ ցանկացած երկիր վաղ թե ուշ մասնակցում է ինտեգրացիոն գործընթացների: «Սակայն դա չի նշանակում, թե երկիրը կորցնում է ինքնիշխանությունը: Ուղղակի տվյալ պարագայում մենք պետք է կոնսոլիդացված քաղաքականություն վարենք արտաքին առևտրի և մի շարք այլ հարցերում»,- նշեց քաղաքագետը՝ մտահոգություն հայտնելով, որ Հայաստանը ՄՄ-ի հետ ընդհանուր սահման չունի:

Քաղաքագետն ընդգծեց, որ ՄՄ-ին անդամակցելով, Հայաստանի առջև այդպիսով լայն շուկա է բացվում, որից օգտվելու համար մեր երկիրը պետք է զարգացնի իր տնտեսական ներուժը: «Եթե մենք չզարգացնենք մեր տնտեսությունը, չենք կարողանա լուրջ օգուտներ քաղել Մաքսային միության շուկայից, ուստի հարկավոր է բարելավել մեր տնտեսական ներուժը և առաջ շարժվել»,-ասաց Բոզոյանը:

Քաղաքագետի խոսքով` Հայաստանի համար լավագույն տարբերակը կլիներ պահպանել կոմպլեմենտար քաղաքականությունը Եվրոպական միության և Մաքսային միության հետ: «Հայաստանին երկար տարիներ հաջողվել է կոմպլոմենտար արտաքին քաղաքականություն վարել՝ լավ հարաբերություններ պահպանելով ինչպես Ռուսաստանի, այնպես էլ Եվրամիության և Ամերիկայի Միացյալ Նահանգների հետ: Կարծում եմ, որ Հայաստանը պետք է զերծ մնար ինտեգրացիոն գործընթացներին ներգրավվելուց և շարունակեր հավասարակշված քաղաքականություն վարել բոլոր կողմերի հետ»,-նշեց նա:

Մաքսային միությանը միանալու Հայաստանի մտադրության մասին հայտարարեց ՀՀ նախագահ Սերժ Սարգսյանը 2013թ. սեպտեմբերի 3-ին Մոսկվայում ՌԴ նախագահ Վլադիմիր Պուտինի հետ հանդիպումից հետո: Դեկտեմբերի 24-ին Մոսկվայում տեղի ունեցավ ՄՄ անդամ պետությունների ղեկավարների հանդիպումը, որի ժամանակ հաստատվեց Հայաստանի ճանապարհային քարտեզը: ՀՀ կառավարությունը հաստատել է նաև ՄՄ անդամակցության ճանապարհային քարտեզից բխող միջոցառումների ծրագիրը: