Ստամբուլահայ երգչուհի Սիբիլի 11 հայերեն երգերով «Սեր» ալբոմն արդեն վաճառքում է

Ստամբուլահայ երգչուհի Սիբիլ Բեկթորոսօղլուի նոր` «Սեր» խորագրով երաժշտական ալբոմը փետրվարի 11-ից վաճառքում է: Ինչպես «Արմենպրես»-ը տեղեկացավ երգչուհուց, «Սերը» նրա երկրորդ ձայներիզն է, որը ներկայացնում է շուրջ 3-ամյա ընդմիջումից հետո: Ալբոմի մեջ ներառված են 12 երգեր, որոնցից 11-ը հայերեն են, մեկը' անգլերեն: Երգչուհին որոշել է երաժշտական ալբոմը «Սեր» անվանել, քանզի համոզված է, որ սերն ամենալավ և ամենաուժեղ զգացմունքն է: Սիբիլը հույս է հայտնում, որ նոր երգերի տեսքով իր պատրաստած անակնկալները կարժանանան հավանության, և երաժշտությունը կդիպչի հանդիսատեսի սրտին:

Ստամբուլահայ երգչուհին առաջին անգամ հայաստանյան ունկնդրին ներկայացել է 2011 թվականի Համահայկական 5-րդ խաղերի բացման և փակման արարողությանը: Երգչուհին նախկինում Ստամբուլում թողարկել է հայերեն 12 երգերից կազմված «Սիբիլ» ձայնասկավառակը, որտեղ ընդգրկված են «Տեր, ողորմեա» եւ «Կիլիկիա» երգերը: Սիբիլի հայերեն երգերն ազատ վաճառվում են Թուրքիայի երաժշտական վաճառակետերում, մեծ պահանջարկ ունեն ոչ միայն հայերի, այլեւ թուրքերի և օտարերկրացիների շրջանում:

Սիբիլը ծնվել է Ստամբուլում, նրա ընտանիքը Թորոսյան ազգանունը փոխել է Բեկթորոսօղլուի: Նրան ծնողներն անվանել են գրող Զաբել Ասատուրի պատվին, ում մականունն էր Սիբիլ: Երգչուհու հայրը' Կարպիսը, ոսկերիչ է, ծնվել է Ստամբուլում, մայրը' Մարին, Սեբաստիայից է: Իր ստեղծագործական գործունեությունը երգչուհին սկսել է եկեղեցական երգչախմբում: Սիբիլը երգիչ Անդրեի հետ 2013 թվականի հունվարին Ստամբուլի «Tim Masla Center»համերգասրահում համերգով է հանդես եկել, որը նվիրված էր Ֆերիքոյ թաղամասի հայկական Վարդանանց եկեղեցու 150- ամյակին և հայկական Մերամեթջյան դպրոց ի 100-ամյակին: Երգչուհին հաջողված համերգային գործունեություն է ծավալում նաև արտերկրում: