Արցախի մարդիկ. աշխարհը կծանոթանա նրանց հետ

Արցախի մարդիկ: Այսպիսինն է ֆեյսբուքյան նոր նախաձեռնության անունը, որի մասին Lurer.com-ի թղթակիցը զրուցել է ծրագրի հեղինակ Աշոտ Մարգարյանի հետ: Վերջինս Լոնդոնի համալսարանական քոլեջի շրջանավարտ է, իսկ ներկայումս աշխատում է որպես Արցախի վարչապետի օգնական:

«Լոնդոնում ուսանելու տարիներին հասկացա, որ միջազգային հանրությունը շատ աղոտ պատկերացում ունի Արցախի վերաբերյալ: Նրանց համար Արցախն անավարտ հակամարտության գոտի է, որտեղ ապրելը չափազանց վտանգավոր է: Կարիք կա այդ կարծրատիպը կոտրելու, ուստի պատահական չէ, որ «Humans of Artsakh»-ի կարգախոսն է «Արցախը կոնֆլիկտ չէ, այլ պետություն»: Մեր նախաձեռնության միջոցով փորձում ենք բարձրացնել Արցախի մասին իրազեկությունը միջազգային լսարանում»,-ասաց Աշոտ Մարգարյանը:

«Humans of Artsakh»-ը ֆոտոպատմությունների շարք է, որտեղ ներկայացվում են Արցախում ապրող մարդկանց, նրանց առօրյան, հետաքրքրություններն ու կենսակերպը: Աշխատանքային խումբը շրջում է Արցախի տարբեր մարզերում և ընտրում ֆոտոհերոսներին: Լուսանկարի հետ միասին դրվում է նաև նրանց մասին պատմող փոքրիկ ակնարկ: Նախաձեռնության հեղինակի համար ներշնչանքի աղբյուր է եղել «Humans of New York» ֆեյսբուքյան էջը, որտեղ ևս ֆոտոպատմությունների միջոցով ներկայացվում է քաղաքի բնակիչների առօրյան:

«Գաղափարը մոտս առաջացավ, երբ ծանոթացա «Humans of New York» էջին: Արցախում աշխատանքի անցնելու հետ մեկտեղ անմիջապես ձեռնամուխ եղա դրա իրականացմանը: Հավաքվել է լուսանկարիչների փոքրիկ թիմ, որին բացառիկ հնարավորություն է ընձեռված միջազգային և հայկական լսարանին ներկայացնելու Արցախն այնպիսին, ինչպիսին կա: Հուսով եմ, որ այս ամենը դրական կազդի նաև լուսանկարիչների անհատական վարկանիշի վրա և արցախցի լուսանկարիչները ճանաչելի կլինեն ամբողջ աշխարհում»,-նշեց ԼՂՀ վարչապետի օգնականը:

Խոսելով ծրագրի հետագա պլանների մասին' Աշոտ Մարգարյանը նշեց, որ չեն պատրաստվում բավարարվել միայն ֆեյսբուքյան և թվիթերյան էջերով լուսանկարների տարածմամբ, այլ հետագայում մտադիր են նաև շրջիկ ցուցահանդեսներ կազմակերպել աշխարհի տարբեր քաղաքներում. «Մեր հիմնական թիրախում միջազգային լսարանն է: Մենք ցանկանում ենք Արցախի համար ստեղծել խաղաղ առօրյայով ապրող երկրի իմիջ, ինչպիսին այն կա: Երբ մարդիկ իսկապես հավատան, որ Արցախը զուտ կոնֆլիկտային գոտի չէ, կարող ենք հետագայում օգտագործել Արցախի զբոսաշրջային ներուժը»:

Նախաձեռնության հեղինակը կոչ արեց բոլորին ոչ միայն միանալ գաղափարին, այլև այն լայնորեն տարածել օտարերկրացի ծանոթների և ընկերների շրջանում:

Անահիտ Մնացականյան