Վիկտոր Ռեբեցը ՀԿԵ-ի աշխատողների կուտակային կենսաթոշակայինի հետ կապված խնդիրը լուծված է համարում

«Հարավկովկասյան երկաթուղի» ՓԲ ընկերության ներկայացուցիչները փետրվարի 12-ին կազմակերպության տարբեր գրասենյակներում հանդիպումներ կունենան երիտասարդ աշխատակիցների հետ և ևս մեկ անգամ կքննարկեն պարտադիր կուտակային կենսաթոշակների հետ կապված խնդիրը: «Արմենպրես»-ի հետ զրույցում «Հարավկովկասյան երկաթուղի» ՓԲԸ գլխավոր տնօրեն Վիկտոր Ռեբեցը հավաստիացրեց, որ քննարկումը հավելյալ է, յուրաքանչյուր չորեքշաբթի տրանսպորատային անվտանգության օր է հայտարարված և հենց այդ շրջանակում էլ կնախատեսեն հանդիպում աշխատակիցների հետ: Սրան զուգահեռ, կազմակերպության տնօրենը պարտադիր կուտակային կենսաթոշակների հետ կապված հարցը լուծված է համարում: Նրա խոսքով' երկու օր առաջ շենքի դիմաց հավաքվածներից ոչ բոլորն էին իրենց աշխատակիցները: Բողոքի ակցիայից հետո նա անձամբ է հանդիպել աշխատակիցներին, զրուցել‚ բացատրել մի շարք կարևոր հանգամանքներ: «Զրուցեցինք մոտ 45 րոպե: Իմ պարզաբանումից հետո աշխատակիցների մոտ գրեթե հարցեր չմնացին: Բացատրեցի, որ ընկերությունը աշխատավարձերի համակարգում նախորդ տարվա ընթացքում որոշակի փոփոխություններ է կատարել ու դրանք հարմարեցրել 2014թ. ներդրվող կուտակային համակարգին: Մենք այդ փոփոխությունները կատարել ենք ի շահ երիտասարդ աշխատակիցների»,-ասաց նա:

Ռեբեցի խոսքով` թեև երիտասարդ աշխատակիցների աշխատավարձերից պահումներ արվել են, սակայն դրանք չեն ուղարկվել համապատասխան ֆոնդ: «Քանի դեռ վերջնական որոշումը չկա, այդ գումարները կպահվեն ընկերության հաշվեհամարին: Եթե օրենքի կիրառումը հետաձգվի, ես այդ գումարները նույն օրը կփոխանցեմ աշխատակիցների հաշվեհամարներին»,-վստահեցրեց նա: Պարտադիր կուտակային կենսաթոշակային նոր համակարգի ներդրումը վերաբերում է «Հարավկովկասյան երկաթուղի» ընկերության աշխատակիցներից 1253-ին: Նրանք կազմում են կազմակերպության ընդհանուր աշխատուժի 28 տոկոսը:

Փետրվարի 10-ին «Հարավկովկասյան երկաթուղի» ընկերության մի քանի տասնյակ աշխատակիցներ Տիգրան Մեծ փողոցի վրա՝ ընկերության շենքի առջև, բողոքի ակցիա էին անցկացնում՝ ընդդեմ պարտադիր կուտակային կենսաթոշակային համակարգի: Նրանց էին միացել պարտադիր կուտակային կենսաթոշակային համակարգի դեմ պայքարող «Դ!ԵՄ ԵՄ» նախաձեռնության անդամները: Ընկերության աշխատակիցները պահանջում էին, որ ընկերության ղեկավար կազմից որևէ մեկը պարզաբանի, թե ինչու են իրենց աշխատավարձից պահումներ արել:

Համակարգը Հայաստանում ուժի մեջ է մտել հունվարի 1-ից: Հունվարի 24-ին ՀՀ Սահմանադրական դատարանի աշխատակարգային որոշմամբ կասեցվել էր «Կուտակային կենսաթոշակների մասին» Հայաստանի Հանրապետության օրենքի 76-րդ հոդվածը և 86-րդ հոդվածի երրորդ մասը, որոնք, ազատում են պատիժներից, եթե գործատուները մինչև մարտի 28-ն իրենց աշխա տողների աշխատավարձից չեն կատարում պարտադիր պահումները: «Կուտակային կենսաթոշակների մասին» ՀՀ օրենքի սահմանադրականության հարցը Սահմանադրական դատարանը կքննարկի մարտի 28-ին: