Հայաստանը խաղաղություն է ցանկանում, բայց ոչ մի հարձակում անպատասխան չի թողնի. Հովիկ Աբրահամյան

Սահմանին Ադրբեջանի իշխանությունների սադրիչ գործողություններին համապատասխան հակահարված է տրվում սահմանը պահող զինվորների ու սպաների միասնական ջանքերով: Այս մասին Տավուշի մարզի զորամասերից մեկում զինվորների և սպայական անձնակազմի հետ հանդիպմանն ասաց ՀՀ Ազգային ժողովի նախագահ Հովիկ Աբրահամյանը: «Մենք, ի տարբերություն Ադրբեջանի, մշտապես պնդում ենք, որ մեր առջև դրված խնդիրները պետք է լուծենք խաղաղ բանակցությունների արդյունքում: Սակայն դա չպետք է լինի միակողմանի: Այդուհանդերձ, Ադրբեջանի իշխանությունները դեռ ողջամիտ վարքագիծ չեն դրսևորում: Մենք ցանկանում ենք խաղաղություն, սակայն եթե մեզ պարտադրեն պատերազմ, շնորհիվ մեր զինվորի' մենք կտանք հակահարված ու կպաշտպանենք մեր հայրենիքը»,- նշեց Աբրահամյանը:

ԱԺ նախագահը վստահություն հայտնեց, որ շատ բարձր հիմքերի վրա է դրված համագործակցությունն Ազգային ժողովի և ՀՀ պաշտպանության նախարարություն միջև, ինչում իր մեծագույն ներդրումն ունի ԱԺ պաշտպանության, ազգային անվտանգության և ներքին գործերի մշտական հանձնաժողովը: «Իհարկե, մենք խիստ կարեւորում ենք մեր սահմանը պահող-պահպանող զինվորի առօրյան, և իհարկե դա հանրության, հանրապետության նախագահի, Ազգային ժողովի, Կառավարության մշտական ուշադրության կենտրոնում է, պարբերաբար նման այցելություններ կազմակերպվում են: Մենք մեր պարտքն ենք համարում լինել ձեր կողքին, ծանոոթանալ խնդիրներին եւ փորձել աջակցել»,-ասաց ԱԺ նախագահը:

Հովիկ Աբրահամյանը հավատացրեց զինվորներին, որ իշխանությունները' ՀՀ նախագահի գլխավորությամբ, մշտապես նրանց կողքին են: Իհարկե, կան խնդիրներ' թե առօրյա և թե գլոբալ, որոնք պահանջում են նյութական մեծ միջոցներ եւ ժամանակ: «Համոզված եղեք, որ բանակը մշտապես մնում է երկրի ղեկավարի, Ազգային ժողովի և Կառավարության ուշադրության կենտրոնում: Յուրաքանչյուր տարի պետական բյուջեն քննարկելիս բանակի հետ կապված ցանկացած առաջարկ միանշանակ պաշտպանվում է, և այդ քաղաքականությունը շարունակական է լինելու»,-նշեց ԱԺ նախագահը:

ՀՀ Ազգային ժողովի նախագահ Հովիկ Աբրահամյանն աշխատանքային այցով մեկնել է Տավուշի մարզ: Օրենսդիրի ղեկավարի առաջին կանգառը մարզի զորամասերից մեկն էր, որտեղ նա ծանոթացավ զինվորների առօրյային, խնդիրներին: ԱԺ նախագահը, զորամաս այցելելիս, զինվորների համար նաև նվերներ էր բերել: