ԵԽ-ն դատապարտել է Ադրբեջանի նախագահական ընտրությունները «ազատ և արդար» գնահատած 9 օրենսդիրներին

Ավստրալիայի հայ, հույն, հրեական, չինական, կորեական և ավստրալացի բնիկների համայնքների ղեկավարները դեմ են Ավստրալիայի' ռասայական խտրականության դեմ օրենքը չեղյալ հայտարարելուն: Ինչպես հաղորդում է Հայ դատի Ավստրալիայի հանձնախմբի ֆեյսբուքյան էջը, համայնքների ղեկավարները հանդես են եկել համատեղ հայտարարությամբ, որով դաշնային պաշտոնյաներին հորդորում են պահպանել օրենքը, որն Ավստրալիայի ազգային ինքնության կարևոր բաղադրիչներից է:

Բանն այն է, որ Ավստրալիայի դաշնային կառավարությունը մտադրություն է հայտնել վերանայել օրենքը' 2011 թվականին ռասայական խտրականության համար դատապարտված սյունակագիր Էնդրյու Բոլթի գործի կապակցությամբ: «Երբ մարդիկ հասկանան, որ գործող օրենքն առնչվում է լուրջ գործերին և պահանջում է համայնքի չափանիշների վրա հիմնված օբյեկտիվ և ոչ զգացմունքային սուբյեկտիվ քննություն, նրանց համար պարզ կլինի, որ այն ոչ մի կերպ չի սահմանափակում խոսքի ազատությունը»,-նշել է համայնքները ներկայացնող խոսնակը' մեկնաբանելով, որ օրենքը մարդկանց չի արգելում ազատորեն արտահայտել իրենց կարծիքներն ու համոզմունքները:

«Ռասայական պատկանելության պատճառով հասցված վիրավորանքը և անարգանքը համոզմունքի դրսևորում չեն, այլ հարձակում նրանց մարդկային արժանապատվության վրա»,- հավելել է նա:

2011 թվականին Դաշնային դատարանը սյունակագիր Էնդրյու Բոլթին մեղավոր էր ճանաչել ռասայական խտրականության մասին օրենքը խախտելու մեջ, որն արգելում էր «վիրավորանքը, անարգանքը, ստորացումները կամ ահաբեկումները» անհատի կամ մարդկանց խմբի դեմ' նրանց մաշկի գույնի, էթնիկ կամ ազգային ծագման հիման վրա: Վճռի համաձայն` «սպիտակամորթ աբորիգենների» մասին Բոլթի հեղինակած մի շարք հոդվածներ «պարունակել են փաստերի անճշտություններ, ճշմարտության աղավաղումներ, գրված են եղել հոխորտուն և սադրող լեզվով»:

Համատեղ հայտարարության տակ ստորագրել են Հայ դատի Ավստրալիայի հանձնախմբի գործադիր տնօրեն Վաչե Ղահրամանյանը, Ավստրալիայի առաջին բնակիչների ազգային հանձնախմբի համանախագահներ Քրիստի Փարքերը և Լես Մալեզերը, Ավստրալիայի հելլենական խորհրդի համակարգող Ջորջ Վելիսը, Ավստրալիայի հրեաների գործադիր խորհրդի գործադիր տնօրեն Փիթեր Ուերթայմը, Ավստրա-չինական ֆորումի նախագահ Փաթրիկ Վուն, Ավստրա-չինական ծառայության ընկերության քարտուղար Թոնի Պանգը, Սիդնեյի կորեական ընկերության ներկայացուցիչ Լյուկ Սոնգը: