«Նաիրիտ» գործարանի աշխատակիցներին չի վճարվել 14-15 ամսվա աշխատավարձ

Կառավարության շենքի մոտ երեկ բողոքի ակցիա էին անում «Նաիրիտ» գործարանի մոտ 400 աշխատակիցներ։ Աշխատակիցներին չի վճարվել 14-15 ամսվա աշխատավարձ: Գրում է «Հրապարակ»-ը:

Նրանց խոսքով, այս պահին հերթափոխի գտնվող աշխատողները նույնպես ցանկացել են միանալ իրենց, սակայն գործարանի ղեկավարությունը դռները փակել է եւ թույլ չի տվել միանալ իրենց։ Աշխատակիցները կառավարությունից պահանջում էին հանդիպում միայն վարչապետի հետ։ Հրաժարվում էին հանդիպել էներգետիկայի եւ բնական պաշարների նախարար Արմեն Մովսիսյանի հետ՝ պատճառաբանելով, թե նա միշտ իրենց խաբել է, սուտ խոստումներ տվել, ասելով, որ գործարանը կաշխատի, եւ իրենք աշխատավարձ կստանան։ Աշխատակիցները սպառնում էին, որ իրենց խնդիրները չլուծվելու դեպքում դիմելու են կտրուկ քայլերի՝ հացադուլ, գործադուլ, ինչպես նաեւ շուրջ 3 հազարից ավելի աշխատակիցներ սպառնում էին՝ «կփոխենք մեր ազգությունը»։ Իմանալով, որ վարչապետը տեղում չէ, բողոքողները տեղի տվեցին եւ գնացին ՀՀ էներգետիկայի եւ բնական պաշարների նախարար Արմեն Մովսիսյանի հետ հանդիպման։

Մովսիսյանը գործարանի աշխատակիցներին կրկին խոստացել էր, որ նրանք վերջին ամսվա՝ հունվարի աշխատավարձը ամենաուշը փետրվարի 20-ին կստանան, իսկ մյուս ամիսների աշխատավարձերի մասին խոսք գնալ չի կարող։ «Նախարարը որեւէ հստակ պատասխան չտվեց, թե ինչ է լինելու գործարանի ճակատագիրը։ Միայն վստահեցրեց, որ մեկ ամսվա աշխատավարձ կստանանք, իսկ մնացած աշխատավարձերի հարցը կախված է գործարանի ճակատագրից»,-ասաց «Նաիրիտի» աշխատակից Կարեն Հակոբյանը։ Նաիրիտցիներին նախարարի պատասխանը չգոհացրեց, եւ նրանք երթով շարժվեցին դեպի նախագահի նստավայր։ «Եթե վարչապետը մեր հարցերին չի պատրաստվում լուծում տալ, պետք է այդ ամենի մասին տեղյակ պահենք նախագահին, որպեսզի գոնե նա մեր հարցով զբաղվի»,-ասաց աշխատակիցը՝ հավելելով. հույս ունեն, որ այնտեղ ինչ-որ մեկը կպատասխանի իրենց հարցերին՝ գործարանի հետագա ճակատագրի հետ կապված։

Մանրամասները` թերթի այսօրվա համարում: