«Սերժի երիտտուզիկների ժամանակը»

Երեկ մարտի մեկին տեղի ունենալիք հանրահավաքի իրազեկման մասին թռուցիկներ բաժանող երիտասարդ ակտիվիստների վրա են հարձակվել մի խումբ անձինք, որոնք ոստիկանների հետ ձեռք ձեռքի տված խլել են թռուցիկները, քաշքշուկ սարքել: Գրում է «Հայկական Ժամանակ»-ը:

Դա ավարտվել է նրանով, որ երիտասարդ ակտիվիստները եւ նաեւ լրագրողներ բռնի ուժով բերման են ենթարկվել ոստիկանության Երեւանի Կենտրոնի բաժին: Այդ «օպերացիայից» կարճ ժամանակ անց պարզվեց, թե ովքեր են այդ «անձինք»: Նրանցից մեկը Հայկ Ղեւոնդյանն է (նկարում` առաջին սյունակում), ով Ագրարային համալսարանի ուսխորհրդի նախագահն է: Երկրորդը Դանիել Հայրապետյանն է' նույն ուսխորհրդի անդամ (նկարում' երկրորդ սյունակում):

«ՀԺ»-ն թերթում տեղադրել է նկարներ, որտեղ  այդ անձինք են` երեկվա «օպերացիայի» ժամանակ: Երկուսն էլ, բնականաբար, երիտհանրապետականներ են: Թե ովքեր են մյուս հարձակվողները, պարզ կդառնա առաջիկայում: Ոստիկանություն բերման ենթարկված երիտասարդները ժամը 22-ի սահմաններում ազատ են արձակվել, եւ նրանց խոսքերով, նյութեր են նախապատրաստվում խուլիգանության հատկանիշներով քրեական գործ հարուցելու համար: Բերմանենթարկված, ապա ազատ արձակված «Չորորդ իշխանություն» օրաթերթի լրագրող Անի Գեւորգյանը պատմել է, որ քաղաքացիական հագուստով մի անձնավորություն հենց ոստիկանության բաժնում ապտակել է իրեն եւ ձեռքից խլել հեռախոսը:

Լրագրողը լուրջ կասկածներ ունի, որ դա հենց բաժնի պետն Արտակ Պողոսյանն է: Լրագրողը պատմել է նաեւ, որ բաժնում իրենից բռնությամբ խլել են ֆոտոխցիկը եւ հիշողության քարտերը, իսկ երբ վերադարձրել են, պարզվել է, որ դրանց պարունակած լուսանկարները ջնջված են:

Մանրամասները` թերթի այսօրվա համարում: