Երեկոյան հայ առաքելական եկեղեցիներում կվառվեն Քրիստոսի լույսը խորհրդանշող խարույկներ

40-օրական Հիսուս Քրիստոսի ընծայումը Տաճարին խորհրդանշող Տեառընդառաջ տոնին' փետրվարի 13-ի երեկոյան, հայաստանյան առաքելական բոլոր եկեղեցիներում կվառվեն խարույկներ: Տեառնընդառաջը կամ ժողովրդական խոսքում առավել կիրառվող Տրնդեզը Հայ Առաքելական Եկեղեցու անշարժ տոներից է և նշվում է ամեն տարի Քրիստոսի Սուրբ Ծննդյան ու Աստվածահայտնության տոնից 40 օր հետո' փետրվարի 14-ին: Տոնի աստվածաշնչյան պատումի համաձայն, երբ լրանում է մանուկ Հիսուսի սրբագործման 40 օրը սուրբ Աստվածամայրը Հիսուսի հետ ներկայանում է Տաճար: Այս մասին հիշատակում է Ղուկաս ավետարանիչը, ով ներկայացնելով Հիսուսի կյանքի այս դրվագը, պատմում է նաև Սիմեոն ծերունու մասին, որին Սուրբ Հոգուց հրամայված էր մահ չտեսնել, մինչև Տիրոջ Օծյալին տեսնելը: Սիմեոն ծերունին տեսնելով մանկանը՝ Տիրոջն ընդառաջ է գնում, այստեղից էլ առաջանում է տոնի անվանումը' «Տիրոջն ընդառաջ»: Ավանդության համաձայն, երբ տեղ են հասնում, Աստծո հրամանով փակված տաճարի արևելյան դուռը դղրդյունով բացվում է, ու մարդիկ ճրագներ ով դուրս են գալիս տներից՝ տեսնելու թե ինչ է կատարվում և այդպիսով ակամա լուսավորում են Հիսուսին: Ավանդության համաձայն' այստեղից էլ առաջացել է կրակներ վառելու սովորույթը:

Եկեղեցական կանոնի համաձայն' Տեառնընդառաջի տոնն սկսվում է փետրվարի 13-ին երեկոյան ժամերգությամբ, որից հետո կատարվում է նախատոնակ: Սովորաբար նախատոնակի արարողության ավարտին կատարվում է Անդաստանի արարողություն, որի ընթացքում օրհնվում են աշխարհի չորս ծագերը: Անդաստանին հաջորդում է մոմերի օրհնության արարողությունը: Եկեղեցու կանթեղներից վերցված կրակով եկեղեցիների բակերում վառվում են խարույկներ, իբրև Քրիստոսի լույսի խորհրդանիշ:

Ն.Ս.Օ.Տ.Տ. Գարեգին Բ Ամենայն Հայոց կաթողիկոսի տնօրինությամբ, արդեն մի քանի տարի է, ինչ Տեառնընդառաջի պատարագից հետո հայոց եկեղեցիներում տեղի է ունենում նաև նորապսակների օրհնության կարգ: