ՀԷՑ-ի տնօրինությունը` աշխատակիցների կուտակային պահումների մասին

«Հայաստանի էլեկտրական ցանցեր» ՓԲ ընկերությունն օրինական է համարում իր աշխատակիցներից կենսաթոշակային պարտադիր կուտակային պահումները: Ընկերության կենտրանական գրասենյակի դիմաց բողոքի դուրս եկած աշխատակիցների հարցերին ի պատասխան ասաց «Հայաստանի էլեկտրական ցանցե ր» ՓԲԸ լրատվական ծառայության պետ Նատալյա Սարջանյանը:

«Հայաստանի էլեկտրական ցանցերի» տարբեր մասնաճյուղերի աշխատակիցների խոսքով' իրենք ցանկանում են պարզաբանում ստանալ, թե ինչու են իրենց աշխատավարձերից պարտադիր կուտակային պահումներ արվել առանց զգուշացման և որտեղ են պահվում այդ գումարները: «Պահումներն արվել են օրենքի պահանջով: Սահմանադրական դատարանի որոշումը չի արգելում պարտադիր կուտակային պահումները, պարզապես պատժից ազատում է այն գործատուներին, որոնք չեն ցանկանա պահել այդ գումարները: «Հայաստանի էլեկտրական ցանցեր» ընկերությունն աշխատակիցների կուտակային գումարները կպահի իր հաշվին մինչև մարտի 28-ին սպասվող Սահմանադրական դատարանի վերջնական որոշումն օրենքի որոշ դրույթների սահմանադրականության վերաբերյալ»,-ասաց Սարջանյանը:

Նրա փոխանցմամբ' այսօր' փետրվարի 13-ին' ժամը 16:00-ին, տեղի է ունենալու քննարկում աշխատակիցների և տնօրինության ներկայացուցիչների միջև, որի ժամանակ կտրվեն աշխատակիցներին հուզող հարցերի պատասխանները: Նրա հավաստմամբ' հանդիպման մասին աշխատակիցները նախապես տեղեկացված են եղել: Սակայն հավաքվածները պնդում են, որ իրենք տեղյակ չեն եղել հանդիպման մասին:

«Հայաստանի էլեկտրական ցանցեր» ՓԲ ընկերության կենտրոնական ապարատի և մասնաճյուղերի աշխատակիցները տնօրինությանն են ներկայացրել բողոք-նամակ' պահանջելով աշխատանքային պայմանների բարելավում և պարտադիր պահումների վերաբերյալ պարզաբանում: Նամակի քննարկման եւ հարցերին պատասխանելու նպատակով ստեղծվել է աշխատանքային խումբ, որը ներառել է ներկայացուցիչներ' շառագրգիռ բոլոր կողմերից, այդ թվում' ընկերության աշխատակիցների արհմիությունից: