Կուտակային համակարգի կողմնակից պատգամավորն արդեն թղթերն է լրացնում կամավոր կուտակելու համար

Կենսաթոշակների պարտադիր կուտակային համակարգը նոր սերնդի ապահով ծերության նախադրյալներից մեկն է: Փետրվարի 13-ին լրագրողների հետ զրույցում այսպիսի կարծիք հայտնեց ՀՀ ԱԺ սոցիալական հարցերի մշտական հանձնաժողովի նախագահ Հակոբ Հակոբյանը: «Հիմա շատ են խոսում այն մասին, որ մենք խփում ենք մարդկանց գրպանին: Մենք մարդկանց գրպանին խփում ենք ոչ թե մեզ համար, այլ նրանց համար: Այս ռեֆորմը մենք իրականացնում ենք, որպեսզի նրանք ապահով ծերություն ունենան: Մենք խփում ենք նաև պետբյուջեի գրպանին, որովհետև պետությունն էլ ձեր կուտակած գումարին իր կողմից ավելացնում է նույնքան գումար»,-նշեց Հակոբյանը:

Նա նշեց, թե իրենց համար սպասելի էր, որ քաղաքացիները բողոքի ալիք կբարձրացնեն, քանի որ ոչ մեկը հեշտությամբ չի համաձայնի, որպեսզի իրենից գումար տանեն: «Սակայն մարդիկ պետք է հասկանան, որ սա արվում է միայն իրենց համար: Ոչ մեկի համար գաղտնիք չէ, որ այսօր 40 հազար դրամ կենսաթոշակով ապահով ծերություն ունենալ անհնար է, իսկ այս ռեֆորմով մենք ցանկանում ենք այնպես անել, որ հետագայում դուք կարողանաք ստանալ արժանապատիվ կենսաթոշակ»,-նշեց Հակոբյանը՝ ընդգծելով, որ Հայաստանում կենսաթոշակային համակարգը թերի էր և լուրջ բարեփոխումների կարիք կար:

Հարցին, թե ինչի համար ինքը չի օգտվում կուտակային կենսաթոշակների կամավոր համակարգից, Հակոբ Հակոբյանը նշեց, որ ինքն ուղղակի չի մտածել իր կենսաթոշակի մասին: Նրա խոսքով` մարդիկ հետաքրքիր հոգեբանություն ունեն' նրանք սովորաբար ժամանակից շուտ չեն ցանկանում մտածել իրենց թոշակի մասին: «Ես էլ այդ հոգեբանությամբ եմ առաջնորդվել և չեմ մտածել իմ թոշակի մասին: Սակայն ասեմ, որ ես միանալու եմ, արդեն թղթերն եմ լրացնում»,- նշեց նա:

Կենսաթոշակների պարտադիր կուտակային համակարգն առաջին անգամ գործարկվել է Չիլիում և լուրջ հաջողություններ է գրանցել: ԱԺ սոցիալական հարցերի մշտական հարցերի հանձնաժողովի նախագահը նշեց, որ Չիլիում 2007-2013թթ. ընթացքում 200 միլիարդ դոլարի կենսաթոշակային ֆոնդ են ունեցել:

«Կուտակային կենսաթոշակների մասին» ՀՀ օրենքը ուժի մեջ է մտել 2014թ. հունվարի 1-ից: Հունվարի 24-ին ՀՀ սահմանադրական դատարանի աշխատակարգային որոշմամբ կասեցվել էին «Կուտակային կենսաթոշակների մասին» Հայաստանի Հանրապետության օրենքի 76-րդ հոդվածը և 86-րդ հոդվածի երրորդ մասը, որոնք, մասնավորապես, գործատուներին թույլ էին տալիս մինչև մարտի 28-ն իրենց աշխատողների հաշիվներին չփոխանցել պարտադիր կենսաթոշակային վճարները: «Կուտակային կենսաթոշակների մասին» ՀՀ օրենքի սահմանադրականության հարցը Սահմանադրական դատարանը կքննարկի մարտի 28-ին: