Արտագաղթի ուսումնասիրման արդյունքները հրապարակման ենթակա չեն

Երեկ «ՀԺ» թղթակցին պաշտոնապես հայտնել են, որ արտագաղթի ուսումնասիրման արդյունքները հրապարակման ենթակա չեն: Ասել է, թե' գաղտնի են:

Փետրվարի 6-ին «ՀԺ»-ն կրթության եւ գիտության նախարար Արմեն Աշոտյանին խնդրել էր մեզ տրամադրել ՀՀ ԿԳՆ գիտության պետական կոմիտեի կողմից սլավոնական համալսարանին պատվիրած' արտագաղթի ուսումնասիրության արդյունքները, որոնք, ըստ համալսարանի եւ պատվիրատու միջեւ կնքված պայմանագրի, պետք է հրապարակվեին այս տարվա հունվարի 24-ին: Հիշեցնենք, 2013թ. պետբյուջեից 13 միլիոն դրամ էր հատկացվել արտագաղթի պատճառներն ուսումնասիրելու համար: Երեկ ԿԳ նախարար Արմեն Աշոտյանից ստացել ենք հետեւյալ պատասխանը. «Ի պատասխան ձեր 06.02.2014թ. հարցման' հայտնում եմ, որ ՀՀ ԿԳՆ գիտության պետական կոմիտեի կողմից Հայ-ռուսական (սլավոնական) համալսարանի հետ գիտական եւ գիտատեխնիկական գործունեության նպատակային-ծրագրային ֆինանսավորման պետական ծրագրի իրականացման համար պետության կողմից դրամաշնորհի ձեւով տրամադրվող ֆինանսական աջակցության գումարների օգտագործման մասին կնքված պայմանագրով կատարված ուսումնասիրման արդյունքների հրապարակում նախատեսված չէ»:

Սույն պատասխանը մեկ անգամ եւս փաստում է, որ պատկերը սարսափելի է: «ՀԺ»-ի տեղեկություններով, հետազոտության արդյունքներն ուղարկվել են կառավարություն: Դրանք այս պահին ուսումնասիրության փուլում են: Չի բացառվում, որ որոշակի շտկումներից, «դզել-փչելուց» հետո դրանք, այդուամենայնիվ, հրապարակվեն: Բայց հասկանալու համար արտագաղթի իրական պատկերը, ամենեւին էլ պարտադիր չէր 13 մլն դրամ ծախսել:

Մանրամասները` թերթի այսօրվա համարում: