Արմեն Աշոտյանն ուսանողների մոտ կասկածամտություն է տեսնում կրթական բարեփոխումների նկատմամբ

Հայաստանյան բուհերում սովորող ուսանողների մեծամասնությունը քիչ է տեղեկացված Բոլոնյան գործընթացի մասին: Այս մասին են վկայում «Այ Փի Էս Սի» քաղաքական և սոցիոլոգիական խորհրդատվությունների ինստիտուտի կողմից իրականացված «Հայաստանի պետական բուհերի ուսանողության Բոլոնյան գործընթացին մասնակցության ուսումնասիրություն» անվանումով հետազոտության արդյունքները: «Բոլոնիայի գործընթացի վերաբերյալ ուսանողների տեղեկացվածությունը բակալավրիատում ցածր մակարդակի վրա է, մագիստրատուրայում' միջին մակարդակի: Սա ավելի շատ բութագրում է ուսանողներին, քան բուհերին, քանի որ տպագրված և էլեկտրոնային տարբերակով բավականաչափ տեղեկատվություն կա այդ համակարգի մասին: Ուսանողները Բոլոնյան գործթացի մասին ավելի շատ տեղեկանում են միջանձնային շփման միջոցով և ադմինիստրացիայի՝ դեկանատների, ամբիոնների ներկայացուցիչներից»,-ներկայացրեց «Այ Փի Էս Սի» քաղաքական և սոցիոլոգիական խորհրդատվությունների ինստիտուտի վերուծաբան Սամվել Մանուկյանը:

Նրա խոսքով' կրեդիտային համակարգի մասին, որը Բոլոնյան գործընթացի բացկացուցիչ է, լավ են տեղեկացված ուսանողները, բայց չգիտեն, որ դա Բոլոնյան գործընթացի մաս է կազմում: «Տարիների ընթացքում տեղեկացվածությունը բարձրանում է, բայց հարցված ուսանողների 16 տոկոսն անգամ մագիստրատուրան ավարտելով չգիտի կրեդիտային համակարգի մասին: Հարցվածների միայն կեսը ճշգրիտ գիտեն, թե ինչպես են հաշվարկվում իրենց գնահատականները, մնացածները մոտավորապես գիտեն գնահատման կարգը»,-նշեց վերլուծաբանը:

Ինչ վերաբերում է ռոտացիոն համակարգին, ապա հարցված ուսանողների 18 տոկոսը երբևէ առնչվել է այս համակարգին, այսինքն' վճարովի համակարգից անցել է անվճարի կամ հակառակը' կախված ուսանողի առաջադիմությունից: «Հարցված ուսանողների 85 տոկոսն այն համարել է որպես արդարացի, որը շատ կարևոր ու լավ ցուցանիշ է»,-ասաց Սամվել Մանուկյանը:

Ներկայացված արդյունքներով' մագիստրատուրայում սովորող ուսանողների 45-70 տոկոսի կարծիքով տարբեր բաղադրիչներով մագիստրատուրիան որակապես տարբերվում է բակալավրիատից: Լավագույն ուսանողները հակված են մեկնելու արտասահման' չվերադառնալու մտադրությամբ:

Իսկ իրենց համալսարանի բյուջեի վերաբերյալ տեղեկությունն ուսանողության մոտ հիսուն տոկոսին հետաքրքրում է, և ավելի շատ նրանց, ում համար ուսման վարձ վճարելը ծանր է:

Կրթության և գիտության նախարար Արմեն Աշոտյանի կարծիքով' հետազոտության արդյունքում դուրս են բերվել օբյեկտիվ գնահատականներ բարձրագույն ուսումնական գործընթացի վերաբերյալ, որոնք հաշվի կառնվեն հետգա իրենց քայլերում: «Բարձրագույն կրթական ծրագրերի անխափան իրականացման համար շատ ենք կարևորում բոլոր շահառուների կարծիքը, հատկապես ուսանողների կարծիքը' որպես հետադարձ կապի լավագույն միջոց: Տվյալները շատ հետաքրքիր են, բավականին օբյեկտիվ են գնահատել մեր ուսանողները այն գործընթացները, որոնք տեղի են ունենում բարձրագույն կրթական համակարգում : Իհարկե, ուսանողների կողմից կա որոշակի կասկածամտություն բարեփոխումների ամբողջական որակի և ընթացքի վերաբերյալ, բայց նրանց կողմից տեսնում ենք նաև պատրաստակամություն դառնալ մեր կրթական ծրագրերի շարժիչ ուժն ու բաղկացուցիչ մասը»,-նշեց Արմեն Աշոտյանը:

Արմեն Աշոտյանը հատկապես կարևորեց այն փաստը, որ կոռուպցիոն մեծ ռիսկեր պարունակող ռոտացիոն համակարգը հայ ուսանողների կողմից բավականին բարձր գնահատականի է արժանացել' որակվելով որպես արդարացի: «Սա ախտորոշիչ հետազոտություն էր, որը մեր հետագա քաղաքականության մշակման հարցում կարևոր դեր է ունենալու»,-փաստեց ԿԳ նախարարը:

Հետազոտությունն անցկացվել է 2013 թվականի հոկտեմբեր-դեկտեմբերին Երևանի և մարզերի պետական բուհերում: Հարցման է ենթարկվել 1202 ուսանող: