Աֆղանստանում իր պարտքը կատարած հայ զինվորն է նաև մեր այսօրվա բանակի աջակիցը. ԱԺ պատգամավոր

ՀՀ Աֆղանստանի պատերազմի վետերանների միավորման նախագահ, ԱԺ պատգամավոր պատգամավոր Արմեն Մխիթարյանը միության անունից շնորհավորական ուղերձ է հղել Աֆղանստանից Խորհրդային զորքերի դուրսբերման 25-ամյակի կապակցությամբ: Շնորհավորական ուղերձում, մասնավորապես, ասված է.

«Հարգելի′ մարտական ընկերներ.

Ընդունեք իմ շնորհավորանքը Աֆղանստանից Խորհրդային զորքերի դուրսբերման 25-ամյակի կապակցությամբ:

1989թ ավարտվեց պատերազմը Խորհրդային զինվորի համար՝ թողնելով անջնջելի հետք պատերազմի արհավիրքը տեսած հայ երիտասարդի վրա, որը մի քանի տարի հետո զենք վերցրեց ու պայքարեց իր հայրերի պապենական հողի համար: Հայրենիքի պաշտպանությունը միշտ եղել և լինելու է հայ զինվորի սուրբ պատքը: Անկասկած է, որ Աֆղանստանում իր պարտքը կատարած հայ զինվորն է նաև մեր այսօրվա բանակի, որի մասին երազել են մեր նախնիները, ու անկախ հայրենիքի հաջողությունների մասնակիցը և աջակիցը:

Փետրվարի 15-ը հիշատակի օր է այն տղաների համար, ովքեր պատվով են կատարել իրենց պարտքը հայրենիքի, այն ժամանակ Խորհրդային Միության հանդեպ: Այն մեզ համար դարձել է քաջության ու հայրենասիրության մի տոն, որը միավորում է սերը երկրի հանդեպ, պատիվն ու հավատարմությունը: Մեր մարտական ընկերների անցած ճանապարհը հարենասիրության դաս է սերունդների համար:

Ժամանակը ցույց տվեց, որ մեր համագործակցությունը նմանատիպ կազմակերպությունների հետ նաև մեր զոհված ընկերների հիշատակի շնորհիվ է:

Մենք խոնարհվում ենք մեր զոհված ընկերների շիրիմների առջև և մեր երախտագիտությունն ենք հայտնում նրանց մայրերին, որոնք իսկական մարտիկ են դաստիարակել, նաև նրանց կանանց, ովքեր դաստիարակում են հայրենիքին արժանի քաղաքացիներ:

Մաղթում եմ իմ բոլոր մարտական ընկերներին քաջառողջություն, երջանկություն և հաջողություններ՝ ի փառս մեր Հայրենիքի»: