ԱԺ մարդու իրավունքների պաշտպանության և հանրային հարցերի մշտական հանձնաժողովը գումարել է հերթական նիստը

Էլինար Վարդանյանի նախագահությամբ` փետրվարի 17-ին տեղի է ունեցել ՀՀ ԱԺ մարդու իրավունքների պաշտպանության և հանրային հարցերի մշտական հանձնաժողովի նիստը: Քննարկվել է ԱԺ պատգամավոր Արտակ Դավթյանի հեղինակած «Հասարակական կազմակերպությունների մասին» ՀՀ օրենքում փոփոխություններ և լրացումներ կատարելու մասին» օրենքի նախագիծը: Ներկայացնելով առաջարկվող լրացումը' Արտակ Դավթյանը նշել է, որ եթե միավորումը 50 եւ ավելի տարի ՀՀ օրենսդրությամբ սահմանված հիմքերով գործում է որպես ստեղծագործական միություն, ապա կարող է պետական գրանցում ստանալ՝ պահպանելով «ստեղծագործական միություն» անվանումը և իրավահաջորդությունը: Փոփոխությամբ առաջարկվում է կազմակերպության բարձրագույն մարմնի ղեկավարի և կազմակերպության գործադիր ղեկավարի ընտրություն կամ նրա լիազորությունների դադարեցում իրականացնել, եթե առկա է բարձրագույն մարմնի անդամների մեկ երրորդի նախաձեռնությունը: Նշվել է, որ գործող օրենքի 14-րդ հոդվածի 2-րդ մասով կազմակերպության հերթական ժողովը հրավիրվում է 2 տարին մեկ անգամից ոչ պակաս: Օրենսդրական նախաձեռնությամբ առաջարկվում է երկու տարվա պարբերականությունը փոխարինել 4 տարով:

Հարակից զեկույցում ՀՀ արդարադատության նախարարի տեղակալ Արամ Օրբելյանը նշել է, որ կառավարությունը սկզբունքային առարկություններ չունի, դրական եզրակացություն է տվել և ներկայացրել մի շարք առաջարկներ:

Հանձնաժողովի նախագահ Էլինար Վարդանյանը օրինագծի իրավական ձևակերպումներին առնչվող մի շարք առաջարկներ է ներկայացրել՝ նշելով, որ առավել հստակ ձևակերպումների դեպքում, որպես պատգամավոր, դեմ չի լինի օրենսդրական նախաձեռնությանը:

Եզրափակիչ ելույթում օրինագծի հեղինակ Արտակ Դավթյանը նշել է, որ պատրաստ է առաջինից երկրորդ ընթերցում առաջարկների հիման վրա համապատասխան փոփոխություններ կատարել և լրամշակել օրինագիծը:

Հանձնաժողովի դրական եզրակացությամբ օրինագիծը կընդգրկվի ԱԺ հինգերորդ գումարման հինգերորդ նստաշրջանի օրակարգում: