«Արև ենք միասին» տեսահոլովակի մասնակից հայտնիները դարձան արյան դոնոր

«Նվիրիր կյանք» բարեգործական հիմնադրամին նվիրված «Արև ենք միասին» երգի տեսահոլովակի մասնակիցների նախաձեռնությամբ Հ. Յոլյանի անվան արյունաբանական կենտրոնում անցկացվեց արյունատվության ակցիա, որի շրջանակում հավաքագրված արյունն անվճար տրամադրվելու է կենտրոնում բուժում ստացող հիվանդներին: Ակցիան նվիրված էր փետրվարի 15-ին' քաղցկեղով հիվանդ երեխաների միջազգային օրվան: Հայաստանի պետական ֆիլհարմոնիկ նվագախումբի գլխավոր դիրիժոր և գեղարվեստական ղեկավար Էդուարդ Թոփչյանը նշեց, որ երեխաներն այս աշխարհում գոյություն ունեցող ամենակարևոր էակներն են: «Երեխաներին թեկուզ մի փոքր օգնելը, նրանց կողքին լինելը ինձ համար գուցե կյանքի կարևոր իմաստներից մեկն է: Եվ անշուշտ ուզում եմ առաջին հերթին մեծ շնորհակալություն հայտնել հանրապետության առաջին տիկին Ռիտա Սարգսյանին, ով փաստորեն գլխավորում է այս շարժումը և նրա շնորհիվ մենք տեսանք, թե արդեն քանի-քանի երեխաների են փրկել»,-ասաց Թոփչյանը:

Երգչուհի Նադեժդա Սարգսյանի գնահատմամբ` չկա մեկը, որը նման նախաձեռնությունների կողքին չկանգնի: «Մենք բոլորս միախմբված, միահամուռ ուժերով պետք է լինենք երեխաների կողքին, դա ոչ թե ցանկություն է, այլ նույնիսկ պարտականություն»,- ընդգծեց Սարգսյանը:

Հաղորդավար, «Արև ենք միասին» երգի խոսքերի հեղինակ Ավետ Բարսեղյանը նշեց, որ նման նախաձեռնությունների մասնակցելու դեպքում, բոլորը միասին դառնում են մի մեծ արև, որը ի զորու է հրաշքներ գործել:

«Ես առաջին անգամ եմ մասնակցում, նախկինոմ առիթ չի եղել և ուրախ եմ, որ այսօր այստեղ եմ, և իմ արյունը կարող է ինչ-որ երեխայի կյանք փրկել»,- նշեց երաժիշտ Արթուր Իսպիրյանը:

Հայաստանի պետական երիտասարդական նվագախմբի գլխավոր դիրիժոր և գեղարվեստական ղեկավար Սերգեյ Սմբատյանն առաջին անգամ էր դառնում արյան դոնոր: «Մենք սատարում ենք այն նպատակը, որն ունեն «Արև ենք միասին» երգը, «Նվիրիր կյանք» հիմնադրամը: Բոլորս միասին այսօր փորձում ենք մի կյանք փրկել»,-ընդգծեց Սմբատյանը' հավելելով, որ ուրախ է, որ այսօր այստեղ է:

Հաղորդավար Եգոր Գլումովը կորցրել է հաշիվը, թե քանի անգամ է արյան դոնոր դարձել: «Ես արդեն չեմ հիշում, թե քանի անգամ եմ մասնակցում, տարին մեկ անգամ արյուն եմ հանձնում: Կարծում եմ, որ արյուն հանձնելով օգնում ենք և պայքարում ենք ինչ-որ մի բալիկի կյանքի համար»,- նշեց հաղորդավարը' հավաստիացնելով, որ իր օրինակը ապացուցում է, որ դոնոր դառնալու դեպքում առողջությանը ոչ մի վտանգ չի սպառնում:

Երգիչ Վարդան Բադալյանն էլ նշեց, որ շատ է կարևորում նման ակցիաներին մասնակցելը, որովհետև այսկերպ ինչ-որ բանով կարողանում է օգնել արյան կարիք ունեցող մարդկանց: «Սիրով միշտ մանսակցել եմ և նույնիսկ իմ ընտանիքի անդամներին եմ հորդորում, որ մասնակցեն»,- ասաց երգիչը:

Երաժիշտ, վոկալիստ Նաիրա Գյուրջինյանին բժիշկները որոշակի առողջական հակացուցումների պատճառով թույլ չտվեցին դառնալ արյան դոնոր: «Եկել եմ արյուն հանձնելու և շատ ամփոսում եմ, որ չեմ կարող հանձնել, իմ լուման ներդնել այս գործին»,- նշեց Գյուրջինյանը, ում գնահատմամբ' մարդիկ պետք է գիտակցեն դոնորության անհրաժեշտությունը, և հատկապես երիտասարդները մասնակցեն նման նախաձեռնությունների:

Հայաստանում տարեցտարի ավելանում են արյան պաշարները: Եթե 2000-2001 թթ. տարեկան իրականացվում էր մոտ 6000- 7000 արյունատվություն, ապա 2010 թվականին կատարվել է մոտ 13 հազար արյունատվություն, սակայն մեր երկիրն ունի հավաքագրվող արյան քանակի ավելացման խնդիր:

Ակցիայի մասնակիցների կարծիքով' կամավոր անվարձահատույց դոնորությունը ազգային պատվի և սեփական արյունը նվիրաբերելու մարդասիրական քայլ է, որը պետք է շարունակաբար քարոզվի, լուսաբանվի և խրախուսվի: Բազայում արյուն ունենալու համար անհրաժեշտ է գիտակցել, որ միայն հանձնած արյան շնորհիվ է հնարավոր փրկել մարդկանց կյանքեր:

Լրագրողների հետ զրույցում Արյունաբանական կենտրոնի տնօրեն Սմբատ Դաղբաշյանը նշեց, որ արյան տարբեր հիվանդություններով տառապող շուրջ 2500 հիվանդների, այդ թվում մոտ 500 երեխաների բուժման համար անհրաժեշտ են մեծ քանակությամբ արյան բաղադրամասեր և հենց այդ բացը լրացնելուն է միտված այս ակցիան: «ՀՀ առաջին տիկնոջ Ռիտա Սարգսյանի անմիջական ղեկավարությամբ' «Նվիրիր կյանք» հիմնադրամի կողմից կազմակերպած ակցիայի շրջանակում մեր կենտրոն են այցելել և դոնոր են դարձել հանրահայտ երգիչ- երգչուհիներ, շոու բիզնեսի աստղեր, նաև գործարարներ»,-ասաց գլխավոր արյունաբանը:

Նրա խոսքով' Հայաստանում կան մոտ 20 հազար ակտիվ դոնորներ, սակայն այդ թիվը դեռևս բավարար չէ բոլոր հիվանդների կարիքները հոգալու համար: Բժիշկը շեշտեց, որ ինչպես հիմնադրամի, այնպես էլ մի շարք հասարակական կազմակերպությունների կողմից իրականացվող աշխատանքը նպաստում է մեր երկրում ևս անվարձահատույց դոնորություն ակտիվացմանը: «Շատ հաճախ տվյալ հիվանդների հարազատներն ի վիճակի չեն լինում արյուն հանձնել, սակայն դա չի նշանակում, որ այս հիվանդները չեն ստանում անհրաժեշտ բուժօգնություն: Այս դեպքերում նրանց փոխներարկվում են կամավոր անհատույց դոնորներից հավաքագրված արյան բաղադրամասերը»,- պարզաբանեց Դաղբաշյանը:

«Նվիրիր կյանք» հիմնադրամը ստեղծվել է 2009 թվականին ռուսաստանյան համանուն հիմնադրամի աջակցությամբ: Հիմնադրամի առաքելությունն է օգնության ձեռք մեկնել երեխաներին: Այն իր ամբողջ ներուժն ուղղում է քաղցկեղով եւ արյան հիվանդությամբ տառապող հայ մանուկների կյանքի փրկությանը: «Նվիրիր կյանք» բարեգործական հիմնադրամին նվիրված «Արև ենք միասին» երգի տեսահոլովակի շնորհանդեսը 2013 թվականի հունիսի 1-ին համախմբել էր հայտնի մշակութային, հասարակական գործիչներին մեկ' բարեգործության գաղափարի շուրջ: Տեսահոլովակի երգի երաժշտու թյան հեղինակն առաջին տիկինն է, խոսքերի հեղինակը' Ավետ Բարսեղյանը, գործիքավորումն իրականացրել է Արա Թորոսյանը: Տեսահոլովակի նկարահանմանը մասնակցել են հայկական մշակութային հանրահայտ գործիչներ, էստրադայի գրեթե բոլոր ներկայացուցիչները, ինչպես նաև Հայաստանի պետական երիտասարդական նվագախումբը: