Հայաստանի փրկարարները կուտակային 5 տոկոս վճարումներ չեն կատարում

ՀՀ ԱԻՆ փրկարար ծառայության աշխատակիցները, լինելով զինծառայողներ, չեն կատարում պարտադիր կուտակային կենսաթոշակային 5 տոկոս վճարումը: Այդ մասին փետրվարի 17-ին հրավիրած ասուլիսում նշեց ՀՀ ԱԻՆ փրկարար ծառայության տնօրենի տեղակալ, գեներալ-մայոր Նիկոլայ Գրիգորյանը: «Ես ներկայացնում եմ փրկարար ծառայությունը, որը զինվորական կառույց է, որպես ծառայողներ' փրկարարները կուտակային գումար չեն տալիս»,-նշեց Գրիգորյանը:

Հայաստանի Հանրապետությունում հունվարի 1-ից գործարկվում է կենսաթոշակային պարտադիր կուտակային համակարգը, ըստ որի' 1974 թվականից հետո ծնված քաղաքացիները կկատարեն 5 տոկոսի չափով պարտադիր վճարումներ' կուտակային հիմնադրամներին: Կենսաթոշակային համակարգի մասնակիցների գումարները կառավարվելու է ֆոնդի կառավարիչների միջոցով: Պարտադիր կուտակային բաղադրիչին պարտադիր կարգով մասնակցում են 1974 թվականի հունվարի 1-ին և դրանից հետո ծնված' վարձու աշխատողները և հանրային ծառայության մեջ գտնվող անձինք, բացառությամբ զինվորական ծառայողների և նրանց հավասարեցված անձանց: