Էդվարդ Միլիտոնյանը էլեկտրոնային և թղթե գրքեր տարանջատումը սխալ է համարում

Հայաստանի գրողների միության նախագահ Էդվարդ Միլիտոնյանը կարծում է, որ սխալ է այսօր հակադրել էլեկտրոնային և թղթե գրքերը: ՀԳՄ նախագահը համոզված է, որ կարևորն այն է, երբ մարդիկ գիրք են կարդում' անկախ տեսակից: «Էլեկտրոնային գիրքը ևս գիրք է: Շատերը հակադրում են էլեկտրոնային գիրքը և դասական գիրքը: Պետք չէ դրանք հակադրել, պետք է ուղղակի նպաստել, քարոզել, որ մարդիկ կարդան: Ով ինչ տեսակի գիրք ցանկանում է' թող կարդա, իսկ ինչ վերաբերում է թղթային տարբերակով գրքին, այն չի մահանա, բազմաթիվ ցուցահանդեսների ժամանակ այն իր դերն ունի և պահանջարկը»,-  նշեց ՀԳՄ նախագահը:

Էդվարդ Միլիտոնյանն ընդգծեց, որ շատերն այսօր շեշտում են «էլեկտրոնային գիրք» արտահայտությունը: «Բնական է, որ պետք է շեշտեն, բիզնեսի ընդլայնման հարց է, սակայն այս քարոզչությունը պետք է միակողմանի չլինի և ստվերի տակ թողնի թղթային գիրքը»,- փաստեց Միլիտոնյանը:

ՀԳՄ նախագահի կարծիքով, գուցե աշխարհում այլ տեսակի գրքեր էլ ի հայտ գան, սակայն ամենակարևորը մարդկանց` գրքեր կարդալու երևույթն է` անկախ գրքի տեսակից: «Ինքս սովոր եմ գիրքը հանել գրադարանից և կարդալ: Փոքր հասակից ինձ դյութել են գրքերի կազմերը' գունավոր, գեղեցիկ, նկարազարդ. դրանք հմայում էին ինձ: Գրքի հոտը ևս ձգում է: Չեմ ցանկանում պաշտպանել մի բան, որն իմ պաշտպանության կարիքը չունի: Թղթային գիրքը հանճարեղ գյուտերից է: Այն կարևոր է և կարևորվում է մարդկանց կողմից, որովհետև աշխարհում 80 տոկոսի չափով հենց թղթային գրքեր են: Ես քարոզում եմ կարդալ, իսկ հետո ով ինչպես կցանկանա` թող ընտրի և կարդա»,-եզրափակեց Միլիտոնյանը: