Հարևանների հետ Ռուսաստանի պատմական, տնտեսական ու սոցիալական կապերին ոչինչ չի սպառնում. Էշթոն

Եվրամիության արտաքին գործերի և անվտանգության քաղաքականության գերագույն ներկայացուցիչ Քեթրին Էշթոնն այն կարծիքին է, որ Ուկրաինայի և Եվրամիության միջև ասոցացման համաձայնագիրը չի սպառնում Ռուսաստանի շահերին: Այս մասին հայտնում է «Կոմերսանտ» թերթը:

Այդ մասին Քեթրին Էշթոնը նշել է իր հոդվածում:

«Ռուսաստանը վախենալու բան չունի: Հարևանների հետ նրա պատմական, տնտեսական ու սոցիալական կապերին ոչինչ չի սպառնում»,- գրում է Էշթոնը:

«Անկախ հետազոտողները հավաստում են, որ Ուկրաինայի և ԵՄ-ի միջև ասոցացման համաձայնագիրը, ներառյալ ազատ առևտրի խորը և համապարփակ գոտու ստեղծման մասին համաձայնագիրը, բացասական ազդեցություն չի ունենա Ռուսաստանի և Ուկրաինայի միջև առևտրի վրա»,-նշել է նա:

Եվրոպական դիվանագիտության ղեկավարն ընդգծում է, որ ԵՄ-ն, ինչպես և Ռուսաստանը, կարևոր առևտրական գործընկեր է տարածաշրջանում, ուստիև ազատ առևտրի մասին համաձայնագիր է առաջարկում Եվրամիությունից արևելք ընկած երկրներին: Դրա հետ մեկտեղ, նրա խոսքով` ԵՄ-ն ոչ մեկի չի ստիպում ընտրություն կատարել:

«Այդ երկրները կարող են միաժամանակ ազատ առևտրի համաձայնագրեր ունենալ Ռուսաստանի և Եվրամիության հետ»,-պարզաբանում է Էշթոնը:

Նրա խոսքով՝ Եվրամիությունը հասկանում է Ռուսաստանի այն ցանկությունը, որ ավելի մեծ թվով երկրներ միանան Մաքսային միությանը: Սակայն, ինչպես ընդգծում է Էշթոնը, «մենք պնդում ենք, որ անհրաժեշտ է հարգել այս կամ այն երկրի ռազմավարական որոշումը. այն պետությունները, որոնք կարող են ապագայում միանալ Մաքսային միությանը, պետք է դա անեն իրենց կամքով»: