Փարաջանովի 90-ամյակին նվիրված մոսկովյան ցուցահանդեսն այցելուների պակաս չի զգացել (լուսանկարներ)

Աշխարհահռչակ ռեժիսոր Սերգեյ Փարաջանովի 90-ամյա հոբելյանի առթիվ Մոսկվայի «Սոլյանկայի պետական պատկերասրահում» փետրվարի 13-ին բացված «Նռան գույնը» խորագրով ցուցահանդեսը համախմբել է անվանի արվեստագետների, պարզապես ռեժիսորի արվեստը գնահատող մարդկանց: «Արմենպրես»-ի թղթակցի հետ զրույցում Սերգեյ Փարաջանովի թանգարանի տնօրեն Զավեն Սարգսյանը պատմեց, որ ցուցահանդեսը մեծ հաջողություն է ունեցել: «Ցուցահանդեսի բացմանը ներկա էին շատ հայտնի մարդիկ, ովքեր կենդանության օրոք ճանաչել են Փարաջանովին: Նրանց թվում են եղել Յուրի Նորշտեյնը, Տոնինո Գուերայի այրին, շատ ուրիշներ»,-նշեց Սարգսյանը:

Նրա գնահատմամբ` ցուցահանդեսի այցելուների քանակը վկայում է, որ մեծանուն ռեժիսորի արվեստն այսօր էլ հետաքրքիր է հանրությանը: Ցուցահանդեսի բացմանը ներկա է գտնվել նաև Փարաջանովի «Մոռացված նախնիների ստվերները» ֆիլմի գլխավոր դերակատարուհի Լարիսա Կադոչնիկովան: «Լարիսա Կադոչնիկովայի, ինչպես նաև լուսանկարիչ Յուրի Մեչետովի մասնակցությամբ փետրվարի 27-ին Երևանի Մոսկվայի տանը նույնպես տեղի կունենա հուշ-երեկո' նվիրված Փարաջանովին»,-տեղեկացրեց թանգարանի տնօրենը:

Նա նշեց ևս մեկ կարևոր փաստի մասին, Մոսկվայի «Նաշչոկինի տուն» պատկերասրահում փետրվարի 10-ին բացվել է Ռուսաստանի արվեստի վաստակավոր գործիչ Պաուլա Վոլկովային նվիրված «Մոտիկ շրջանակ» խորագրով ցուցահանդեսը, որտեղ ներկայացվել են նաև Փարաջանովի, Տարկովսկու, այլ հայտնիների լուսանկարները: «Ես նաև կազմակերպիչներին հանձնեցի Տարկովսկու' Փարաջանովին բանտի տարիներին ուղղված հինգ նամակների կրկնօրինակները, որոնք ընթերցվեցին երեկոյի ընթացքում»,- պատմեց Սարգսյանը: Նա նշեց, որ Մոսկվայում գտնվելու օրերին հարցազրույցներ է տվել ռուսական «Կուլտուրա», «Ռոսիա- 24» հեռուստաալիքներին, այլ հեղինակավոր լրատվամիջոցների:

«Նռան գույնը» ցուցահանդեսը բաղկացած է երեք բաժնից: Առաջին բաժնում այցելուները հնարավորություն ունեն դիտել կինոռեժիսորի իլյուստրատիվ արվեստը ներկայացնող շուրջ 30 կոլաժային աշխատանքները, որոնց մեծ մասը նախկինում երբևէ չի ցուցադրվել Մոսկվայում: Երկրորդ մասը' Փարաջանովի «Նռան գույնը», «Աշուղ Ղարիբը», «Մոռացված նախնիների ստվերները» և «Անդրիեշ» ֆիլմերն են, ինչպես նաև Երևանի կոնյակի գործարանի («Արարատ» կոնյակների) աջակցությամբ նկարահանված' ռեժիսորի մասին պատմող ֆիլմը:

Զուգահեռաբար ցուցասրահներում կներկայացվեն նաև Զավեն Սարգսյանի և Յուրի Մեչետովի' տարբեր տարիներին արված լուսանկարները: Մոսկովյան ցուցահանդեսը բաց կլինի մինչ մարտի 16-ը: Փարաջանովի 90-ամյա հոբելյանը կնշվի նաև հուլիսի 13-20-ը կայանալիք «Ոսկե ծիրան» միջազգային կինոփառատոնում, որն այս տարի կնվիրվի մեծանուն կինոռեժիսորին:

Պատրաստեց Տաթևիկ Գրիգորյանը

Լուսանկարները' Զավեն Սարգսյանի